Ում դեմ են ուղղված թուրք-ադրբեջանական զորավարժությունները. ռուսաստանցի փորձագետի դիտարկումները

Ադրբեջանը վերջին մի քանի շաբաթներին անցկացվող զորավարժությունների միջոցով ստուգում է իր զորքերի պատրաստվածության աստիճանը: Ապրիլի 16-21-ը Ադրբեջանի զինուժը անցկացրեց հրամանատարաշտաբային լայնածավալ ուսումնական հավաքներ, որին մասնակցել են մեծ թվով զորքեր և ռազմական տեխնիկա: Մայիսի 1-ին Ադրբեջանը սկսել է թուրքական զինուժի հետ համատեղ օպերատիվ-մարտավարական զորավարժությունները, որի նպատակը ադրբեջանական և թուրքական զինված ուժերի համագործակցության, համակարգման բարելավումն է: Բայց սա որոշ չափով նաև ուժի ցուցադրում է հարևանին՝ «Առաջին լրատվական»-ի հետ զրույցում մեկնաբանեց Մոսկվայի Հասարակական-քաղաքական հետազոտությունների կենտրոնի տնօրեն, ռազմական փորձագետ Ալեքսեյ Մախլայը:

«Ադրբեջանը սկզբում անցկացրեց հրամանատարաշտաբային հավաքներ, հիմա անցկացնում է օպերատիվ-մարտավարական զորավարժություններ: Այսպիսին է ուսումնական զորավարժությունների անցկացման կարգը: Սա զինված ուժերի վիճակի ստուգում է: Ուժի ցուցադրությունն ակնհայտ է, ուստի ճիշտ է այն, որ Հայաստանը հիմա մարտական պատրաստականության վիճակի է բերել իր զինված ուժերը: Այն թելադրված է այսօր տվյալ տարածաշրջանում առաջացած իրադրությամբ»,- նշեց փորձագետը:

Այդուհանդերձ, Ա. Մախլայը քիչ հավանական է համարում այն, որ թուրք-ադրբեջանական համատեղ զորավարժությունները կարող են հանգեցնել ռազմական կոնֆլիկտի Հայաստանի հետ, թեև ընդունում է չափազանց բարդ իրավիճակը տարածաշրջանում, հատկապես իրադրությունը Ղարաբաղյան հակամարտության գոտում:

Փորձագետի խոսքով՝ ադրբեջանական զինուժը վերջին տարիներին զգալի առաջընթաց է ունեցել, այնուամենայնիվ՝ ադրբեջանական բանակը մարտական ոգով և բարոյահոգեբանական պատրաստվածությամբ էապես զիջում է հայկական բանակի զինվորներին. «Գլխավորն այն է, որ մարդ տիրապետում է տեխնիկային, իսկ տեխնիկան առանց մարդու մեռած է: Ես չէի ասի, թե Ադրբեջանի զինված ուժերն այսօր գերազանցում են իրենց հարևաններին մարտական վարպետությամբ»:

Թուրքիան, ասում է ռազմական փորձագետը, միջազգային քաղաքականության տեսանկյունից կոպտորեն խախտում է ՆԱՏՕ-ի կանոնադրությունը՝ զորավարժություններ անցկացնելով ՆԱՏՕ-ի անդամ չհանդիսացող Ադրբեջանի հետ:

«Թուրք հրահանգիչները, խորհրդականները վաղուց են գտնվում Ադրբեջանում, այնտեղ ակտիվորեն մասնակցում են Ադրբեջանի զինուժի պատրաստությանը: Բացի այդ, Թուրքիան նմանատիպ զորավարժություններ է անցկացնում նաև Վրաստանի հետ: Ի դեպ, այս զորավարժություններից հետո՝ հունիս ամսին, պետք է տեղի ունենան Վրաստանի, Թուրքիայի և Ադրբեջանի եռակողմ զորավարժությունները, որոնք կանցկացվեն Վրաստանի տարածքում: Սա ռազմական ցուցադրության մի շարք է: Թուրքիան փաստացի փոխանցում է այս երկու պետությունների զինված ուժերին մարտական գործողությունների իրականացման իր փորձը և կատարելագործում նրանց վարպետությունը»:

Թուրք-ադրբեջանական համատեղ զորավարժությունները, ըստ Ադրբեջանի ՊՆ-ի հաղորդագրության, տեղի են ունենալու մայիսի 1-5-ը: