Նոր պայթյունի եզրագծին

Հայելի / Հյուսիսային Կորեան միակ պետությունն է, որը 21-րդ դարում միջուկային զենքի փորձարկումներ է կատարել, հայտարարել է ՄԱԿ-ի Գլխավոր քարտուղար Անտոնիո Գուտերասը` բացելով Նյու Յորքում Հյուսիսային Կորեայի միջուկային ճգնաժամին նվիրված ՄԱԿ-ի Անվտանգության խորհրդի հատուկ նիստը. «Ես կոշտ քննադատության եմ ենթարկում Կորեայի կողմից ՄԱԿ-ի Անվտանգության խորհրդի որոշումների շարունակական խախտումները»:
Խորհրդում նախագահող ԱՄՆ պետքարտուղար Ռեքս Թիլերսոնը կոչ արեց միջազգային հանրությանը միավորվել՝ Փհենյանի վտանգավոր միջուկային ծրագրին վերջ տալու նպատակով. «Ողջ աշխարհի համար վտանգ հանդիսացող այս հարցում մեր անգործությունն աղետալի հետևանքների կհանգեցնի: Ռազմավարական համբերության քաղաքականությունն ավարտվում է: Հետագայում համբերատարությունը կնշանակի միայն միջուկային զենքի տիրապետող Հյուսիսային Կորեա»: Թիլերսոնը հիշեցրել է, որ ԱՄՆ-ը խոշոր չափի մարդասիրական օգնություն է ուղարկում Հյուսիսային Կորեա, որից Փհենյանը չի հրաժարվում. 1995-ից ի վեր ԱՄՆ-ից Հյուսիսային Կորեա ավելի քան 2 միլիարդ դոլարի մարդասիրական օգնություն է ուղղվել:
Մեծ Բրիտանիայի արտգործնախարար Բորիս Ջոնսոնն իր կողմից ընդգծել է, որ վերջին տասնամյակներում Հյուսիսային Կորեայի բնակչությունն ամենածանր փորձությունների է ենթարկվել սեփական կառավարության կողմից. «Լինելով մի երկիր, որն իր քաղաքացիներին հասցրել է ծառերի տերևներով սնվելուն, Փհենյանի վարչակարգը դրա փոխարեն իր ամբողջ ջանքերն ուղղում է միջուկային զենքի և հրթիռների զարգացմանը»:
Չինաստանն ու Ռուսաստանը միացել են ՄԱԿ-ի Գլխավոր քարտուղար Գուտերասի կոչին՝ վերջ դնել Հյուսիսային Կորեայի միջուկա-հրթիռային ծրագրին: «Մենք լավ ենք պատկերացնում մեր հարևանների զգացմունքները, երբ Հյուսիսային Կորեայի տարածքից առանց նախազգուշացման հերթական հրթիռն է օդ բարձրանում», – ասել է ՌԴ փոխարտգործնախարար Գեննադի Գատիլովը:
Չինաստանի ԱԳ նախարար Վանգ Յին հիշեցրեց, որ ցանկացած ճգնաժամ նաև նոր հնարավորություններ է բացում’ կոչ անելով խնդիրը լուծել բանակցային ճանապարհով: Սակայն, եթե Մոսկվան և Պեկինը ցանկանում են կարգավորել խնդիրը միայն բանակցային սեղանի շուրջ, Վաշինգտոնում հայտարարում են, որ առաջընթացի բացակայության և Փհենյանի կողմից սադրանքների դեպքում դիվանագիտական և տնտեսական պատժամիջոցները կարող են լրացվել նաև ռազմական հակազդեցությամբ:
Նկատենք, որ ՌԴ ՀՕՊ-ը մարտական բարձր պատրաստության է բերվել հյուսիսկորեական հրթիռի արձակումից հետո: ՌԴ Դաշնային խորհրդի պաշտպանության ու անվտանգության հարցերով կոմիտեի ղեկավար Վիկտոր Օզերովը հայտարարել է, որ Ռուսաստանի հակաօդային պաշտպանության համակարգերը Հեռավոր Արևելքում գտնվում են մարտական բարձր պատրաստության վիճակում՝ կապված Հյուսիսային Կորեայի կողմից հրթիռի արձակման հետ։ «Ռուսաստանը չափազանց ուշադիր հետևում է Հյուսիսային Կորեայում ընթացող իրադարձություններին։ …Մենք վերահսկում ենք օդային տարածքը ՌԴ օդուժի պատասխանատվության գոտում»,-ասել է նա։
Սենատորի խոսքով՝ Ռուսաստանն իրեն հաշիվ է տալիս, որ չի հանդիսանում թիրախ հյուսիսկորեական հրթիռային արձակումների համար։ «Մյուս կողմից՝ տեխնիկան տեխնիկա է, և մեր զինվորականները կանեն իրենցից կախված ամեն բան, որպեսզի արտառոց իրավիճակում թույլ չտան Ռուսաստանի տարածքում հրթիռի պատահական անկում»,-ասել է նա։
Նախօրեին Հյուսիսային Կորեան սպառնացել է խորտակել ԱՄՆ-ի ատոմային սուզանավը: Ամերիկյան ատոմային «Միչիգան» սուզանավին, որը մուտք է գործել հարավկորեական Պուսան նավահանգիստ, «խղճուկ վախճան» է սպասվում, եթե Վաշինգտոնը ձեռնարկի սադրիչ գործողություններ։ Այս մասին գրում է հյուսիսկորեական «Ուրի մինչժոկիրի» պորտալը։
Եթե սուզանավը համարձակվի որևէ գործողություններ ձեռնարկել, այն չի կարողանա մակերևույթ բարձրանալ, քանի որ կունենա խղճուկ վախճան՝ վերածվելով ծովային հոգու՝ ասվում է հրապարակման մեջ։ Հեղինակի կարծիքով՝ Հյուսիսային Կորեայի հանդեպ ցանկացած միջոցառումների պատրաստ լինելու ամերիկյան վարչակազմի հայտարարությունները ցույց են տալիս, որ Վաշինգտոնը մոտենում է ռազմավարական սցենարի իրագործման, որի դեպքում ցանկացած պահի կարող են իրական ռազմական գործողություններ սկսվել։
ԱՄՆ նախագահ Դոնալդ Թրամփն իր ֆիլիպինցի գործընկեր Ռոդրիգո Դուտերտեի հետ քննարկել է Հյուսիսային Կորեայի սպառնալիքը, հայտնում է Սպիտակ տունը: «Դա շատ բարեկամական քննարկում է եղել, որի ընթացքում երկու ղեկավարները քննարկել են ԱՍԵԱՆ-ի մտավախությունները տարածաշրջանային անվտանգության հարցում, այդ թվում՝ Հյուսիսային Կորեայի կողմից սպառնալիքը»,- ասվում է հաղորդագրության մեջ: