«Վաղը Սերժը հրամայի ինձ բաց թողնել՝ բաց եք թողնելու». դատարանում կրքերը բորբոքվեցին

«Սասնա ծռեր»-ին օժանդակելու մեջ մեղադրվող Կարո Եղնուկյանը իրեն կալանքի տակ պահելը համարում է պատասխան իր քաղաքական գործունեությանը։

«ՍԱՍ-ն է ձեզ հրամայում՝ Սերժիկ Ազատովիչի Սարգսյանը: Նա ինչ- որ ասում է դա էլ կատարում եք, ՍԱՍ-ի Արտակը չէ, Սերժը: Վաղը հրամայի ինձ բաց թողնել, բաց եք թողնելու, հրամայի տեսակցություններիս վրա դրված արգելքը վերացնել, վերացնելու եք»,- այսօր Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում հայտարեց Կարո Եղնուկյանը:

Նա դատարանին հիշեցրեց, որ թողել է ԱՄՆ-ի իր բարեկեցիկ կյանքը եւ 5 երեխաների հետ եկել Հայաստան՝ երեխաներին հայեցի դաստիարակելու համար: Իսկ այսօր ամեն ինչ անում են, որ լքի Հայաստանը. «Ոչ դա չեմ անելու, չեմ գնալու: Պայքարելու եմ, ձեզ ծնկի բերեմ: Եւ դուք մեղա պետք է գաք իմ առջեւ մի օր՝ Եղնուկյան, մեղք ենք գործել»:

Դատարանում քննվում էր Կարո Եղնուկյանի բողոքը` քննիչի և դատախազի կողմից առանց հիմնավորումների պաշտպանական կողմից միջնորդությունները մերժելու վերաբերյալ: Իսկ միջնորդությունները վերաբերում են տարբեր փորձաքննություններ անցկացնելուն, գործի վարույթը կարճելուն։

Դատական նիստին, երբ Կարո Եղնուկյանն իր՝ կալանքի տակ պահելը համարեց քաղաքական որոշում, դատավորն էլ հորդորեց խոսել բուն բողոքի մասին:

Քննիչ- դատախազ- դատավոր համակարգը Կարո Եղնուկյանին հիշեցնում է ստալինյան ռեժիմը։ «Այն օրը նայում էի «Կարոտ» ֆիլմը եւ մի նախադասություն տեսա, ասեց՝ բա դուք մեղք չե՞ք, այս ի՞նչ անեծքով տուն կպահեք, ես հիմա ձեզ եմ ասում, բա դուք մեղք չե՞ք, այս ի՞նչ անեծքով տուն կպահեք»:

Աշխատանքային ծանրաբեռնվածության պատճառով դատական նիստը հետաձգվեց մինչեւ մայիսի 10-ը: