Մայրիկիս միշտ ասում եմ, որ «Ոսկե գնդակն» է իմ առավոտյան վեր կենալու և ֆուտբոլ խաղալու մոտիվացիան. Լամին Յամալ

Իսպանիայի հավաքականի 17-ամյա հարձակվող Լամին Յամալը մեկնաբանել է Ֆրանսիայի նկատմամբ Ազգերի լիգայի կիսաեզրափակչում տարած պատմական 5:4 հաշվով հաղթանակը, ինչպես նաև խոսել է հունիսի 8-ին կայանալիք եզրափակչի և իր անձնական նպատակների մասին:

Հունիսի 5-ին Մյունխենում կայացած կիսաեզրափակչում Իսպանիայի հավաքականը գոլային հրավառությամբ հաղթեց Ֆրանսիային: «Բարսելոնայի» երիտասարդ վինգեր Լամին Յամալը դարձավ հանդիպման գլխավոր հերոսներից մեկը՝ խփելով երկու գոլ:

«Եզրափակիչը նման կլինի այս խաղին: Մենք և Պորտուգալիան ուժեղ թիմեր ենք՝ համաշխարհային մակարդակի խաղացողներով: Հաղթելու է ուժեղագույնը, և ես կարծում եմ, որ Իսպանիան կնվաճի տիտղոսը»,-խաղից հետո հայտարարել է Յամալը:

Յամալը նաև անդրադարձել է «Ոսկե գնդակ» մրցանակը նվաճելու իր հնարավորություններին:

«Մայրիկիս միշտ ասում եմ, որ «Ոսկե գնդակն» է ինձ առավոտյան վեր կենալու և ֆուտբոլ խաղալու մոտիվացիան: Բայց խոսքերն այնքան կարևոր չեն, որքան դաշտում ցույց տված խաղը: Իսկ Դեմբելե՞ն: Նա հիանալի խաղացող է, բայց եզրափակչում մենք ենք հաղթելու»,-ասել է Յամալը Mundo Deportivo-ի հետ զրույցում:

Սպորտային մի շարք պարբերականներ Լամին Յամալին և Ֆրանսիայի հավաքականի ու ՊՍԺ-ի հարձակվող Ուսման Դեմբելեին համարում են «Ոսկե գնդակ» մրցանակի գլխավոր հավակնորդներ: Ներկայիս տիտղոսակիրը Յամալի հայրենակից Ռոդրին է:

Ազգերի լիգայի եզրափակիչը Իսպանիայի և Պորտուգալիայի հավաքականների միջև կկայանա հունիսի 8-ին՝ Մյունխենի «Արենա» մարզադաշտում, մեկնարկը՝ Երևանի ժամանակով 23:00-ին: