Ով որքան ձայն կստանա ընտրություններում․ սոցիոլոգը հայտնել է տվյալները

Ապրիլի 30-31-ը «Սոցիոմետր» կազմակերպությունը սոցիոլոգիական հարցում է իրականացրել եւ պարզել, որ մայիսի 14-ին կայանալիք Երևանի ավագանու ընտրությունների առաջատարը իշխող ՀՀԿ-ն է:

Ըստ կազմակերպության ղեկավար, սոցիոլոգ Ահարոն Ադիբեկյանի՝ Հայաստանի Հանրապետական կուսակցությունը կստանա ընտրողների ձայների 67 տոկոսը, «Ելք» դաշինքը՝ 21 տոկոսը, «Երկիր Ծիրանի» կուսակցությունը՝ 12 տոկոսը: Այս մասին Ադիբեկյանը խոսեց մայիսի 10-ին տեղի ունեցած մամուլի ասուլիսի ժամանակ:

Նրա խոսքով` հարցումից պարզ է դարձել, որ Երեւանի ընտրողները բաժանվում են երեք խմբի՝ ընտրություններին չհետեւողներ, չհետաքրքրվողներ եւ հետաքրքրված անձիք:

«Շուրջ 14 տոկոսը չի հետևում Երևանի ավագանու ընտրությունների շուրջ զարգացումներին, 43 տոկոսն ընդհանարապես չի հետաքրքրվում դրանցով, մյուս 43 տոկոսը հետաքրքրվում է և հնարավոր է, որ մասնակցի Երևանի ավագանու ընտրություններին: Ընտրություններին հաստատ գնացողները հարցվածների 41 տոկոսն են, 6.3 տոկոսն ասել է, որ հնարավոր է, որ մասնակցի»,- նշում է Ադիբեկյանը:

Սոցիոլոգի կարծիքով, քվեարկության օրն առավելագույնը սպասվում է 57 տոկոս ակտիվություն, նվազագույնը՝ 47 տոկոս: Ըստ նրա, առավել օպտիմալ է, որ ընտրություններին կմասնակցի երևանցիների 49 տոկոսը:

Հարցվածների մեջ, նշում է Ադիբեկյանը, մեծ մաս են կազմում նաև չկողմնորոշվածները, որոնք տատանվում են «Ելքի» և «Երկիր Ծիրանի»-ի միջև: «Սակայն ՀՀԿ-ի ընտրազանգվածն ավելի հստակ է»,- հավելեց նա:

Հարցին, թե ինչպես եք գնահատում Երևանում փոփոխությունները, ըստ Ադիբեկյանի, հարցվածների 14 տոկոսն ասել է, որ «վատ է եղել», 19 տոկոսն ասել է, որ «ավելի է վատացել», մնացածը 67 տոկոսը գտնում է, որ «եղել է նորմալ և ավելի է լավացել, որը Տարոն Մարգարյանի շնորհքն է»:

Մայրաքաղաքի խնդիրներից, ըստ սոցիոլոգի, բնակիչներին հիմնականում հետաքրքրում է տրանսպորտի, աղբահանման, կանաչապատման, բակերի բարեկարգման, շենքերի տանիքների և վերելակների վերանորոգման հարցերը: