Հնգյակից մնացին երկուսը․ փոքրիկները պայքարում են իրենց կյանքի համար

Մայիսի 3-ին լույս աշխարհ եկած հնգյակից երկու նորածինները շարունակում են պայքարել իրենց կյանքի համար եւ նրանք բավական հաջողությունների են հասել: ՀՀ գլխավոր նեոնատոլոգ Պավել Մազմանյանը, պատասխանելով armtimes.com-ի հարցին, ասաց, որ փոքրիկների վիճակը կայուն է` փոքր դրական դինամիկայով:
Պարզաբանելով, թե ինչպես է արտահայտվում դրական տեղաշարժը` բժիշկը մանրամասնեց, որ երեխաները կերակրվում են 17 մլ մայրական կաթով եւ թթվածնային նվազագույն կախվածություն ունեն:
Ավելի վաղ` մայիսի 10-ին, Պավել Մազմանյանը մեր զրույցում նշել էր, որ նորածինները 7 մլ կաթ են ստանում: Նա հաստատեց, որ այս առաջընթացը մեծացնում է դրական սպասելիքները:
Հիշեցնենք, որ մայիսի 3-ին Հայաստանում աննախադեպ ծնունդ էր գրանցվել: Բնական ճանապարհով լույս աշխարհ էր եկել հնգյակ` չորս աղջիկ եւ մեկ տղա: Երեխաներից երեքը, ցավոք, ապրեցին ընդամենը մի քանի օր: Երկու աղջիկներից մեկն այժմ գտնվում է Մոր եւ մանկան առողջության պահպանման գիտահետազոտական կենտրոնում, մյուսը` «Սուրբ Աստվածամայր» բժշկական կենտրոնում:
«Էրեբունի» բժշկական կենտրոնից տեղեկացանք, որ հնգյակի մայրը` 23-ամյա Լուսինե Պողոսյանն, այսօր դուրս կգրվի: Նրա վիճակը լավ է, ետծննդաբերական ու ետվիրահատական խնդիրներ չկան: Հնգյակը ծնվել էր «Էրեբունի» բժշկական կենտրոնում, այնուհետեւ, բացի մեկ երեխայից, մյուս 4-ը տեղափոխվել են Երեւանի տարբեր բուժհաստատություններ: