Այլ տարբերակ չկա

ՀԱՅԵԼԻ / Արցախի Հանրապետության Նախագահ Բակո Սահակյանը մայիսի 13-ին ընդունել է ԵԱՀԿ գործող նախագահի անձնական ներկայացուցիչ, դեսպան Անջեյ Կասպշիկին:
Այս մասին տեղեկացնում են Արցախի Հանրապետության նախագահի մամուլի ծառայությունից։ Հանդիպմանը քննարկվել են Արցախի և Ադրբեջանի զինված ուժերի շփման գծում տիրող իրավիճակին վերաբերող մի շարք հարցեր:
Անջեյ Կասպշիկին ընդունել է նաև Արցախի արտաքին գործերի նախարար Կարեն Միրզոյանը: Հանդիպման ընթացքում կողմերը քննարկել են Արցախի ՊԲ և Ադրբեջանի զինված ուժերի շփման գծում առկա իրադրությանը վերաբերող մի շարք հարցեր։ Մասնավորապես, Կարեն Միրզոյանը ուշադրություն է հրավիրել վերջին շրջանում հրադադարի ռեժիմի խախտման հաճախակիացած դեպքերին։
Այս համատեքստում ընդգծվել է ԵԱՀԿ գործող նախագահի անձնական ներկայացուցչի գրասենյակի ընդլայնման և շփման գծում միջադեպերի հետաքննության մեխանիզմների ներդրման վերաբերյալ 2016 թ․ մայիսի 16-ին Վիեննայում և 2016 թ. հունիսի 20-ին Սանկտ-Պետերբուրգում ձեռք բերված պայմանավորվածությունների իրագործման հրատապությունը։ Հանդիպմանը անդրադարձ է կատարվել նաև ԵԱՀԿ գործող նախագահի անձնական ներկայացուցչի գրասենյակի գործունեության վերաբերյալ մի շարք հարցերի։
Բավական ակտիվություն է ցուցաբերում վերջին օրերին ԵԱՀԿ Մինսկի խմբի ամերիկացի համանախագահ Ռիչարդ Հոգլանդը, որը Վաշինգտոնում՝ Atlantic Council կենտրոնում կայացած «Հայ-ադրբեջանական հակամարտության միջազգային քաղաքականություն» համաժողովում արձանագրել է, որ ԵԱՀԿ Մինսկի խումբը չի հանձնվում:
Հոգլանդի խոսքով՝ այսօր բանակցությունների սեղանին դրված են ճգնաժամային իրավիճակից դուրս գալու հիմնարար առաջարկներ և փաստաթղթեր, և ոչ ոք չպետք է հրաժարվի դրանցից: Ամերիկացի համանախագահը նշել է, որ պետք է քաղաքական կամք դրսևորել խաղաղության հասնելու համար, ինչն իր հերթին կայունություն կբերի երկու ժողովուրդներին էլ: «Խնդիրը կայանում է նրանում, որ այսօր երկու երկրների երիտասարդ սերունդները չեն շփվել միմյանց հետ և վստահություն չունեն իրար հանդեպ՝ չնայած ավագ սերունդը հիշում է, թե ինչպես են երկու ժողովուրդները կողք կողքի ապրել»,-ասել է Հոգլանդը:
Նրա խոսքով՝ Մինսկի խումբը հիմնվում է երեք հիմնարար սկզբունքների վրա՝ ուժի չկիրառում, տարածքային ամբողջականություն և ժողովուրդների ինքնորոշում: «Մենք չենք հանձնվում, կողմերը չեն հանձնվում, ոչ մեկ չի հանձնվում: Բոլորը փնտրում են կայուն խաղաղության ուղի»,- շեշտել է Հոգլանդը՝ հավելելով, որ ինքը լավատես է հակամարտության լուծման հարցում:
Միջնորդներն ակնհայտորեն փորձում են Սարգսյան-Ալիև հերթական հանդիպում կազմակերպել, սակայն նկատվում է, որ նրանք չեն ցանկանում անպտուղ հանդիպում գրանցել: Ավելին, դեռ նույնիսկ անցյալ տարի ապրիլյան քառօրյայից հետո կողմերին ներկայացված պահանջները չեն կատարվել` Ադրբեջանի մեղքով:
Իրավիճակը ոչ միայն փակուղում է, այլև բացարձակապես պարզ չէ, Ադրբեջանի «արգելափակման» պայմաններում ինչից և ինչպես պետք է սկսել բանակցությունները:
Այս իրավիճակում պաշտոնական Երևանը, թերևս, պետք է ժամանակ ձգի` մինչև Ադրբեջանը սահմանային միջադեպերի հետաքննության մեխանիզմների վերաբերյալ համաձայնություն չկա:
Սպասողական վիճակն, իհարկե, հղի է վտանգներով. ամեն պահի ռազմական գործողությունները կարող են բռնկվել, սահմաններում իրավիճակը կարող է թեժանալ:
Մյուս տարբերակը` ճնշումների գործադրում է, որը, բնականաբար, կարող է իրեն թույլ տալ Ռուսաստանը` որպես «դաշնակից» պետությունը: Այլ տարբերակ ուղղակի չկա, կամ չի մնացել:

շարունակությունը՝ կայքում