ՀՀԿ-ականի կողմից ծեծված թոշակառուն երկրորդ անգամ կհետազոտվի

Երեկ «ՉԻ»-ն տեղեկացրել էր, որ Շիրակի մարզի Սարատակ գյուղում քարոզարշավի շեմին արտասովոր միջադեպ է գրանցվել։ Բանն այն է, որ 10 տարվա ՀՀԿ-ական գյուղապետ, այժմ էլ թեկնածու Ղրզոյան Միշայի որդին ծեծի է ենթարկել համագյուղացի տիկնոջը՝ թոշակառու Սվետլանա Վարդանյանին։ Վերջինս երկու անգամ բուժզննում է անցել։ Առաջինը՝ Գյումրիում, որտեղ դատաբժիշկը թեթեւ մարմնական վնասվածք է ախտորոշել։ Երկրորդը՝ Երեւանի «Գրիգոր Լուսավորիչ» ԲԿ-ի պրոֆեսոր Զորաբյանի մոտ, որը ախտորոշել է ուղեղի ցնցում։ Չնայած սրան՝ Արթիկի ոստիկանական բաժանմունքը կարծես թե չի շտապում արձագանքել միջադեպին։ Երեկ «ՉԻ»-ն զրուցեց տիկին Սվետլանայի դստեր հետ, որը մեզ փոխանցեց, թե այսօր իրենք դիմելու են համապատասխան ոստիկանական բաժանմունք՝ լրացուցիչ դատաբժշկական ուղեգրի պահանջով։ Քանի որ հակասություն կա Գյումրիի եւ Երեւանի բժշկական եզրակացությունների միջեւ, ուստի՝ Վարդանյանները որոշել են պահանջել լրացուցիչ փորձաքննություն։ Այսօր տիկինն այդ պահանջով դիմելու է համապատասխան կառույցին։ Երեկ մենք ընդգծել էինք, որ ՀՀԿ-ական գյուղապետը «ծեծի» եւ դրա կոծկումը ոստիկանական կապերի հաշվին իրականացնելու բազմամյա փորձ ունի։ Ոստիկանության գործողությունների հապաղումը այս դրվագով էլ դրա մասին է վկայում։ Ի դեպ՝ ՀՀԿ-ականը փոխանակ մտահոգվի, թե ինչպես է դուրս գալու այս իրավիճակից, որպես թեկնածու գրանցվելու պատվին մատաղ է արել` գյուղում քեֆ-ուրախություն սարքելով։