Կայացավ «TrioLab» հայ-ռուսական ներկայացման պրեմիերան

Սեպտեմբերի 20-ին Հայաստանի թատերական գործիչների միության բեմում կայացավ «TrioLab» («Տրիո»Լաբորատորիա) ներկայացումը։ «TrioLab»-ը պիլոտային նախագիծ է, որը կյանքի է կոչվել Ռուսաստանի և Հայաստանի թատերական գործիչների միությունների միջև համագործակցության հուշագրի շրջանակում։ Նախագիծը միավորում է Հայաստանի և Ռուսաստանի նկարիչներին, ռեժիսորներին և դերասաններին։ Վիճակահանությամբ ձևավորվեցին հինգ խումբ, որոնցից յուրաքանչյուրը ներկայացնում էր ստեղծագործական եռյակ՝ նկարիչ, ռեժիսոր և դերասան։ Երեք օրվա ընթացքում նրանք պատրաստեցին մինչև 10 րոպե տևողությամբ մինի-ներկայացումներ, էսքիզներ, ինստալյացիաներ կամ պերֆորմանսներ։ Լաբորատորիայի ընդհանուր թեման որոշվել էր ղեկավարների՝ Ռուսաստանի թատերական արվեստի ինստիտուտի (ԳԻՏԻՍ) դասախոս և նկարիչ Վիկտորիա Խարխալուպի և երաժշտական թատրոնի ռեժիսոր Ալլա Չեպինոգայի կողմից։ Ընտրվել էր Օվիդիոսի «Մետամորֆոզներ» ստեղծագործությունը՝ որպես փոխակերպումների և նոր աշխարհ ստեղծելու գործընթացի խորհրդանիշ։ Մասնակիցները հնարավորություն ունեին ընտրելու դրվագներ «Մետամորֆոզների» 15 գրքերից։ 

Նախագիծը դարձավ յուրահատուկ փորձ, որտեղ առաջնային էր վիզուալ գեղարվեստական լուծումը։ Նկարիչների խնդիրը սահմանափակ միջոցներով ստեղծել ոճավորված դեկորացիաներ և զգեստներ, ռեժիսորների խնդիրն էր համադրել ստեղծագործական հայեցակարգը, իսկ դերասանները մարմնավորում էին այդ տեսլականը՝ ներդաշնակորեն ինտեգրվելով նկարչի ստեղծած միջավայրում։ «TrioLab»-ի եզրափակիչ ներկայացումը հանդիսատեսի կողմից ընդունվեց մեծ հետաքրքրությամբ և ջերմ արձագանքով՝ դառնալով հայ-ռուսական ստեղծագործական համագործակցության նոր էջ։