«Ակնհայտ է, որ Սարգսյանի ելույթը գրողը պետական կառավարման համակարգերի կարևորությունից հասկացել է»

«Փաստ» օրաթերթը գրում է.
Գերագույն խորհրդի նախկին պատգամավոր, «Սասնա ծռեր» համակարգող խորհրդի նախկին անդամ Ալբերտ Բաղդասարյանը «Փաստի» հետ զրույցում տեսակետ հայտնեց, որ Սերժ Սարգսյանի ուղերձը պատգամավորներին՝ հաջողություն չի ունենա:
Նշենք, որ 6–րդ գումարման խորհրդարանում Սերժ Սարգսյանը մեր ներքին թշնամին համարեց «անարդարությունը», իսկ կոռուպցիայի առթիվ ասաց. «Ազնվություն գումարած պրոֆեսիոնալիզմ հանած կոռուպցիա». սա է ցանկալի հաջողության բանաձևը: Այստեղ է, որ մենք պետք է հենվենք գործի գիտակների վրա: Կոռուպցիան դիլետանտների համար է գրավիչ, պրոֆեսիոնալների համար այն տհաճ է, վանող և պարզապես անշահավետ: Նորընտիր Ազգային ժողովին բաժին է հասել նաև շատ յուրահատուկ մի առաքելություն: Դուք եք ապահովելու պետական կառավարման համակարգի ձևափոխումը»:
Ներկայացնում ենք «Փաստի» զրույցը ԳԽ նախկին պատգամավորի հետ:

– Պարոն Բաղդասարյան, կայացավ ԱԺ առաջին նիստը, Ձեր կարծիքով Սերժ Սարգսյանի ուղերձը՝ մասնավորապես կոռուպցիայի մասով, ի՞նչ հաջողություն կունենա այդ լսարանի դեպքում:
– Սերժ Սարգսյանի ելույթից իմ մոտ դեժավյու էր, 30 տարի հետ գնացի ու հիշեցի Լ.Ի. Բրեժնևի երկարաշունչ ճառերը, որտեղ նա մատնանշում էր անկեղծորեն բոլոր թերությունները և լուծման բոլոր ուղղությունները, իսկ կյանքում Կոմկուսն ու սովետական կառավարման համակարգն իրականացնում էին այդ խոսքերի ճիշտ հակառակը, ինչի հետևանքով Սովետական միությունը փլուզվեց: Սերժ Սարգսյանը կոռուպցիայի մասին խոսեց այն մարդկանց առաջ, որոնք քաղաքական կոռուպցիայով հայտնվել են այդ դահլիճում, և 10 հազար դրամները դրա երևացող կողմն էին: Մարդկանց առաջ հանդես գալ, որոնք իրենց միլիոնները վաստակում են կոռուպցիայով, մենաշնորհներով, իշխանության հետ սերտաճելով, պաշտոնյաներին կաշառելով, դա դեմագոգիայի դրսևորում է: Սերժ Սարգսյանը ինչ ասել է, ճիշտ է ասել: Ակնհայտ է, որ նրա ելույթը գրողը պետական կառավարման համակարգերի կարևորությունից հասկացել է: Բայց առ այսօր կյանքում կատարվել է ճիշտ հակառակը, և այսուհետ էլ է կատարվելու ճիշտ հակառակը, դա մտավախություն է առաջացնում:
– Ասել է թե՝ հաջողություն չի՞ ունենա Սերժ Սարգսյանի ուղերձը:
– Սերժ Սարգսյանի ուղերձն ինձ համար օդի տատանում է, որովհետև Սահմանադրությունը, որի մասին այդքան խոսում է, և կառավարման նոր համակարգը, ընդունվել է կեղծիքներով, երկրորդ՝ չի ապահովում պետական կառավարման համակարգի պատասխանատվությունը: Սա մեկ հոգու գենսեկական Սահմանադրություն է: Կոռուպցիան Հայաստանում հիմնականում պետական համակարգի գործունեության հետևանք է, իսկ վերջին 10 տարում այդ համակարգի գործունեությունը ապահովում են համակարգի կրողները՝ Սերժ Սարգսյանի գլխավորությամբ:
– Այսօրվա խորհրդարանն ի՞նչ դերակատարություն է ունենալու և ի՞նչ խնդիր կարող է լուծել երկրում:
– Ով որ նրանց ընտրել է, նրանց առաջ էլ նրանք պատասխանատու են: Խորհրդարանի մեծամասնությունը պատգամավոր է դարձել Սերժ Սարգսյանի և նրա շրջապատի որոշմամբ: Մեթոդները, որով նրանք դարձել են պատգամավոր, բոլորին են հայտնի: Հետևաբար նրանք պատասխանատու են այն համակարգի առաջ, որն իրենց ծնել է և նրանց գործունեությունն ուղղված է լինելու այդ համակարգի ամրապնդմանը և այդ անհատների ուժեղացմանը տնտեսապես, ֆինանսապես և քաղաքականապես, իսկ նրանց ուժեղացումը կատարվում է բացառապես պետության, երկրի հաշվին, նրանք հզոր են այնքանով, որքանով թուլանում է պետությունը:
– Մինչդեռ ասվում է, որ նոր Սահմանադրությամբ լայն դերակատարություն է տրվել ընդդիմությանը:
– Այս խորհրդարանում միակ ընդդիմությունը վերապահումներով «Ելք» դաշինքը կարող է լինել: Բայց «Ելք» դաշինքը կողմ է եղել Սահմանադրությանը: Սակայն իրենց ունեցած ձայներով իրենք բացարձակ որևէ ազդեցություն չեն ունենալու խորհրդարանական գործունեության վրա, բյուջեի հաստատման, օրենքի ընդունման վրա: Սերժ Սարգսյանն ունի այս խորհրդարանում 3/5–րդ մեծամասնություն:
– Ի վերջո, սա Սերժ Սարգսյանի բաղձալի խորհրդարա՞նն է, նրա գծած սցենարով:
– Կարծում եմ, որ Հայաստանում չկա մեկը, որ այլ կարծիք ունենա:

Շարունակությունը` «Փաստ» օրաթերթի այսօրվա համարում