Մենք հույսեր ունեինք․ Լապորտան՝ Ոսկե գնդակի արդյունքների մասին

«Բարսելոնայի» նախագահ Ժոան Լապորտան արձագանքել է թիմի եզրային հարձակվող Լամին Յամալի՝ «Ոսկե գնդակի» քվեարկությունում երկրորդ տեղ զբաղեցնելուն։ Յամալն արժանացել է նաև Ռայմոն Կոպայի անվան մրցանակին, որը շնորհվում է մինչև 21 տարեկան աշխարհի լավագույն երիտասարդ ֆուտբոլիստին։

«Երկրորդ Կոպա մրցանակը Լամինի համար մեծ նշանակություն ունի։ 18 տարեկանում «Ոսկե գնդակի» ֆինալիստ դառնալն արդեն իսկ անհավանական ձեռքբերում է։ Երկու Կոպա մրցանակ ունենալն աննախադեպ է։ Համոզված եմ, որ Լամինն այժմ կպայքարի «Ոսկե գնդակի» համար։ Արարողության ժամանակ մեծ լարվածություն կար. լսվում էին «Ուսման, Ուսման» բացականչություններ, իսկ մենք՝ «Բարսայի» երկրպագուներս, վանկարկում էինք՝ «Լամին, Լամին»։ Վստահ եմ, որ սա նրան էլ ավելի կմոտիվացնի», -նշել է Լապորտան։

«Մենք հույսեր ունեինք, քանի որ անվանակարգվածների թվում էին Ռաֆինյան, Լամինը և Պեդրին։ Ի վերջո, ֆինալիստներ դարձան Լամինն ու Դեմբելեն։ Կարծում եմ՝ Չեմպիոնների լիգայի հաղթանակը կարևոր դեր խաղաց Դեմբելեի հաղթանակում։ Այդուհանդերձ, երկու Կոպա մրցանակը ևս մեկ ճանաչում է, որն աննախադեպ է։ Համոզված եմ, որ Լամինը կհասնի «Ոսկե գնդակին»։ Ժամանակը ցույց կտա, սակայն նա բացառիկ տաղանդով և մեծ ներուժով խաղացող է», - Լապորտայի խոսքերը մեջբերում է Mundo Deportivo-ն։

«Ոսկե գնդակի» հաղթող է ճանաչվել ՊՍԺ-ի հարձակվող Ուսման Դեմբելեն։

Անցած մրցաշրջանում «Բարսելոնայի» և Իսպանիայի հավաքականի եզրային հարձակվող Լամին Յամալը 58 խաղում խփել է 18 գոլ և կատարել 25 գոլային փոխանցում։