«Վերջին զանգը» չի հնչի տասնյակ դպրոցներում

Հայաստանի տասնյակ դպրոցներում այս տարի «Վերջին զանգը» չի հնչի, պատճառը շրջանավարտների բացակայությունն է:

Ինչպես հաղորդում է «ժողովուրդ» օրաթերթը, նման խնդիր առկա է սահմանամերձ մարզերում: Օրինակ՝ Սյունիքի մարզի մի շարք գյուղերի դպրոցներում չկան շրջանավարտներ, իսկ եթե կան՝ երկու-երեքն են:

Լծեն գյուղը շրջանավարտ չունեցողների թվում է: «Գյուղը շատ է դատարկվել, մարդիկ չեն կարողանում այստեղ ապրել»,- թերթի հետ զրույցում նշել է Լծենի գյուղապետ Հրահատ Նիկալյանը:

Սյունիքի մարզի Չափնի գյուղում դպրոց չկա, գյուղն ունի 7 աշակերտ, որոնք էլ հաճախում են հարևան Եղեգ գյուղի դպրոց: Նույն մարզի Թանահատ գյուղում ոչ դպրոց կա, ոչ էլ աշակերտ, իսկ Շրվենանց համայնքում արդեն 7 տարի է, ինչ դպրոցը փակվել է, ու ընդհանրապես աշակերտ չունեն:

«Պատկերը ողբերգական է, և այս ամենը արտագաղթի հետևանք է»,- գրում է թերթը:
Այս տարի 9-րդ դասարանը կավարտի 7750, իսկ 12-րդ դասարանը՝ շուրջ 410 աշակերտ:

Ինչպես «Նովոստի-Արմենիային» տեղեկացրին ՀՀ Կրթության և գիտության նախարարությունից, 2016 թ-ի սեպտեմբերի 1-ի դրությամբ պետական դպրոցներում 9-րդ դասարանը սկսել են 29 642 աշակերտ, իսկ 12-րդ դասարանը 410 աշակերտ