Ում է թիրախավորել Թրամփը

«Թրամփը հերթական անգամ խախտեց ավանդույթը, քանի որ դեռևս Ռեյգանից սկսած՝ ԱՄՆ նախագահներն առաջին պաշտոնական այցով մեկնում են հարևան երկրներ՝ Մեքսիկա կամ Կանադա :Բացի այն, որ սա այց էր Սադուդյան Արաբիա և հանդիպում այնտեղի իշխանությունների հետ, այստեղ տեղի ունեցավ արաբա-իսլամա-ամերիկյան գագաթաժողով, որին մասնակցում էին 55 արաբական և մուսուլմանական երկրների առաջնորդներ և բարձրաստիճան պաշտոնյաներ, և սրա արդյունքում հռչակվեց ռազմավարական ծրագիր, որը շատ կարևոր է իր բովանդակության առումով»,-Հայելի ակումբում լրագրողներին ասաց արաբագետ Արմեն Պետրոսյանը՝անդրադառնալով ԱՄՆ նախագահ Դոնալդ Թրամփի՝ Մերձավոր Արևելք կատարած այցելությանը:
«Սա նպատակ է հետապնդում հիմնականում սուննիական ուղղվածության երկրներին միավորել մեկ ընդհանուր գաղափարի շուրջ՝ ընդդեմ ահաբեկչական սպառնալիքի։ Հետաքրքիր էին նաև Թրամփի կողմից հայտարարված թիրախները՝ Իրան և նրա տարածաշրջանային դաշնակիցներ՝ լիբանանյան «Հիզբալլահ», պաղեստինյան «Համաս»։ Սա մեսիջ էր՝ ուղղված նաև Իսրայելին»։
«Ֆինանսական գործարքները նշանակում են, որ ԱՄՆ-ը Սաուդյան Արաբիային զինում է մինչև ատամները: Սաուդյան Արաբիան և նրա կոալիցիան այդ սպառազինությունը երկու հիմնական ուղղությամբ կարող է ուղղել՝ Իսրայել կամ Իրան։ Բայց քանի որ հետո ականատես եղանք Իսրայել կատարած այցին և այնտեղ հնչած մեսիջներին, պարզ է, որ արաբաիսրայելական հակամարտությունը մղվում է երկրորդ պլան, և առաջին թիրախն այնուամենայնիվ Իրանն է և նրա գլխավորած շիայական դաշինքը»,-ասաց նա:.
Այս գործընթացների մեկնարկը, ըստ նրա՝ ցույց է տալիս, որ ականատես ենք լինելու մերձավորարևելյան տարածաշրջանում իսլամի երկու ուղղությունների ներկայացուցիչների միջև հակամարտության սրման. «Զարգացումներն ընթանալու են Իրան-Սաուդյան Արաբիա կամ շիայական և սուննիական երկրների միջև մրցակցության, իսկ առանձին վայրերում՝ նաև հակամարտության տեսքով»։