«Քանի Սերժ Սարգսյանը կա, բան չի փոխվի». Վոլոդյա Ավետիսյանը բանտից ուղիղ գնաց կառավարություն

«ՀԺ» / «Վարդաշեն» քրեակատարողական հիմնարկից 2013 թ.-ին հայտարարած համաներման շրջանակներում այսօր ազատ արձակված պահեստազորի գնդապետ Վոլոդյա Ավետիսյանը մեղադրեց իշխանություններին ապօրինությունների մեջ եւ հայտարարեց, որ ապրիլյան պատերազմական գործողությունները «կազմակերպված էին հողերը հանձնելու նպատակով»:

Նա ընդունեց, որ սխալ է գործել, երբ 2008 թ.-ի նախագահական ընտրություններին աջակցել է Սերժ Սարգսյանին: «Երբ նա պաշտպանության նախարար էր, եւ առաջադրվեց ընտրություններին, ես նրան աջակցեցի: Որպես պաշտպանության նախարար ես նրանից վատ բան չեմ տեսել: Դե կոռուպցիան (բանակում) միշտ էլ եղել է, անգամ Լեւոն Տեր-Պետրսյանի ժամանակ,- ասաց նա ու շարունակեց,- Երբ նշում էինք Սերժ Սարգսյանի հաղթանակը, ես մոտեցա նրան ու ասացի՝ «պարոն նախագահ մի մոռացեք , որ մենք ծովից ծով Հայաստան ենք կորցրել»: Նա պատասխանեց՝ «էլ չենք կորցնի»: Բայց խաբեց»:

Նրա համոզմամբ, ապրիլյան պատերազմական իրադարձությունները, որի ժամանակ ինքն անազատության մեջ էր, «կազմակերպված էին հողերը հանձնելու նպատակով»:

Միեւնույն ժամանակ նա հայտարարեց, որ իր քաղաքական հայացքներում փոփոխություն տեղի չի ունեցել եւ շարունակում է պահանջել Սերժ Սարգսյանի հրաժարականը: «Սերժ Սարգսյանը եւ իշխանությունները պետք է հրաժարական տան»,- ասաց նա՝ հավելելով, որ ՔԿՀ-ից անմիջապես գնալու է Հանրապետության հրապարակ եւ նստացույց է սկսելու՝ պահանջելով, որ Հայաստանում գործի վաղաժամկետ պայմանական ազատման ինստիտուտը։

Այս պահին Ավետիսյանը կառավարության շենքի մոտ ցույց է անում:

Հիշեցնենք, որ Վոլոդյա Ավետիսյանին առաջին ատյանի դատարանը մեղավոր է ճանաչել ՀՀ քրեական օրենսգրքի 178 հոդվածի 2-րդ մասի 2-րդ և 5-րդ կետերով և ՀՀ քրեական օրենսգրքի 34-178 հոդվածի 2-րդ մասի 5-րդ կետով նախատեսված հանցանքներ կատարելու մեջ:

Վոլոդյա Արտուշի Ավետիսյանի նկատմամբ վերջնական պատիժ է նշանակվել ազատազրկում՝ վեց տարի ժամկետով:

Վոլոդյա Ավետիսյանի նկատմամբ նշանակված պատժի սկիզբը հաշվվում է 2013 թվականի սեպտեմբերի 20-ը: Հիշեցնենք, որ Էրեբունի եւ Նուբարաշեն վարչական շրջանների ընդհանուր իրավասության դատարանը ապրիլի 14-ին մերժել է Վոլոդյա Ավետիսյանին պայմանական վաղակետ ազատ արձակելու դիմումը:

Պայմանական վաղակետ ազատ արձակման անկախ հանձնաժողովը 6 անգամ մերժել էր Վոլոդյա Ավետիսյանի դիմումը՝ վաղաժամկետ ազատ արձակվելու մասին: