«Այ մարդ, էդ Ամյանին չեմ ճանաչում». Նիկոլայ Ծատուրյանը`ՀՀ վաստակավոր արտիստի մասին

Սերժ Սարգսյանը մայիսի 28-ին վաստակավոր արտիստի կոչումներ է տվել շոու բիզնեսի մի քանի ներկայացուցիչների: Հանրության կողմից առավել քննադատվեց երաժշտարվեստի բնագավառում ունեցած վաստակի համար երգիչ Ռազմիկ Ամյանին բաժին հասած վաստակավորի կոչումը: Armtimes.com-ը ՀՀ ժողովրդական արտիստ, պրոֆեսոր Նիկոլայ Ծատուրյանից հետաքրքրվեց, թե ի՞նչ կարծիք ունի հատկապես Ռազմիկ Ամյանին տրված վաստակավորի կոչման մասին:

«Այ մարդ, չեմ ճանաչում էդ Ամյանին, ի՞նչ իմանամ լավ ա, վատն ա…Անունն եմ լսել, իրեն չեմ լսել»,- armtimes.com-ի հետ զրույցում ասաց Ծատուրյանը:

Այն հարցին, թե Սերժ Սարգսյանի կողմից Արմենչիկին տրված ՀՀ վաստակավոր արտիստի կոչումից հետո, սա երկրորդ դեպքն է, որ հանրության կողմից մեծ քննադատության է արժանանում, Ծատուրյանը նշեց.

«Ի՞նչ են ասում, որ Արմենչիկն արժանի՞ էր, իսկ Ռազմիկ Ամյանը՝ ո՞չ: Լավ են արել, տվել են, արժանի են…»,- հեգնեց Նիկոլայ Ծատուրյանը:

ՀՀ ժողովրդական արտիստ Նիկոլայ Ծատուրյանը կարծում է, որ Հայաստանում վաստակավոր արտիստի կոչումն արժեզրկված է:

«Վաստակավորի կոչմանն արժանանալու համար պետք է շատ լավը լինել: Հայաստանում վաստակավորի կոչումն արժեզրկված է, նույնիսկ ես ժողովրդական արտիստի կոչում ունեմ»,- ասաց նա:

Ռազմիկ Ամյանը ծնվել է 1982 թվականին՝ Արցախում: Սովորել է Սայաթ-Նովայի անվան երաժշտական ուսումնարանում, ապա Երևանի Կոմիտասի անվան պետական կոնսերվատորիայի վոկալ-դասական բաժնում:

Հիշեցնենք, որ մայիսի 28-ին վաստակավորի կոչման են արժանացել նաեւ Ա. Սպենդիարյանի անվան օպերայի եւ բալետի ազգային ակադեմիական թատրոնի պարուհի Սյուզաննա Փիրումյանը (պարարվեստի բնագավառում ունեցած վաստակի համար), երգչուհի Էմմա Պետրոսյանը (երաժշտարվեստի բնագավառում ունեցած վաստակի համար), Գեորգի Մանգասարյանը (երաժշտարվեստի բնագավառում ունեցած վաստակի համար), օպերային երգչուհի Իրինա Զաքյանը (երաժշտարվեստի բնագավառում ունեցած վաստակի համար), Թբիլիսիի Պ. Ադամյանի անվան պետական հայկական դրամատիկական թատրոնի դերասանուհի Մելանյա Բարսեղյանը (թատերարվեստի բնագավառում ունեցած վաստակի համար), Հայաստանի Հանրապետության ժողովրդական արտիստի պատվավոր կոչում է ստացել՝ Գ. Սունդուկյանի անվան ազգային ակադեմիական թատրոնի գեղարվեստական ղեկավար Արմեն Էլբակյանը (թատերական արվեստի բնագավառում ունեցած վաստակի համար):