Հրաձգություն Կալիֆոռնիայի առևտրի կենտրոնում՝ «Սև Ուրբաթի» ժամանակ. վիրավորվել է երեք անձ

«Սև Ուրբաթի» գնորդները ստիպված են եղել ապաստան փնտրել այն բանից հետո, երբ ԱՄՆ Կալիֆոռնիա նահանգի Սանտա Կլարա քաղաքի Westfield Valley Fair առևտրի կենտրոնում կրակոցներ են հնչել, որի հետևանքով, ըստ ոստիկանության, վիրավորվել է երեք մարդ, հայտնում է LA Times-ը։

Ըստ Սան Խոսեի ոստիկանության դեպարտամենտի տվյալների, երեք մարդ տեղափոխվել է հիվանդանոց կյանքին վտանգ չսպառնացող հրազենային վնասվածքներով։ Ինչպես դեպքի վայրում լրատվամիջոցներին հայտնել է դեպարտամենտի ներկայացուցիչ, սերժանտ Խորխե Գարիբայը, տուժել են մեծահասակ տղամարդ, մեծահասակ կին և 16-ամյա աղջիկ։

«Բլումինգդեյլս» խանութի անվտանգության աշխատակիցների կողմից մոտ 20 գնորդներ ուղեկցվել են պահեստային սենյակներ, նրանց թվում էին նաև Բիլալ Զուբերին և նրա կինը, ովքեր այդ միջադեպի մասին հրապարակում են արել X սոցիալական ցանցում։ Նա չի լսել կրակոցներ, բայց ասել է, որ տիրում էր համընդհանուր խուճապ, իսկ վերևում կախված էր հայտարարություն այն մասին, որ դռները փակված են և նրանք պետք է մնան իրենց տեղերում։ Զուբերիի խոսքով՝ իրենք ձգտել են խուճապի չմատնվել և չխոսել կրակոցների մասին, քանի որ իրենց հետ միասին թաքնվում էին նաև երեխաներ։ Նրա խոսքով՝ ոստիկանությունը թույլատրել է դուրս գալ խանութից և առևտրի կենտրոնից երեկոյան ժամը 7-ի սահմաններում։ Բոլոր ելքերի մոտ երթևեկությունը խցանվել էր, քանի որ հարյուրավոր մարդիկ փորձել են լքել շենքը, ասել է նա։

«Սա անտեղյակ գնորդների դեմ չէր», - ասել է Գարիբայը: «Երկու մարդկանց միջև ինչ-որ բան է տեղի ունեցել, որը հանգեցրել է կրակոցների»:

Գարիբայը նշել է, որ երկու վիրավոր կանայք, ենթադրաբար, անցորդներ են եղել և «կապ չեն ունեցել միջադեպի հետ»։

Նա ասել է, որ կասկածյալը, ենթադրաբար, փախել է ոստիկանության ժամանումից առաջ և զենք չի հայտնաբերվել։