Երկրորդ փորձը Հայաստանում, սկանդալային միջադեպից հետո

ԼՐԱԳԻՐ / Քաղաքացիական ավիացիայի գլխավոր վարչության տարածած տեղեկության համաձայն, վարչության պետը մայիսի 30-ին ընդունել է «Լյուֆթանզա գրուպ» ընկերության գլխավոր տնօրեն, Ռուսաստանի Դաշնությունում և ԱՊՀ երկրներում կապի գրասենյակի տնօրեն Ռոլանդ Շուլցին, Ուկրաինայում, Բելառուսիայում, Վրաստանում և ՀՀ-ում առևտրի գլխավոր մենեջեր Ռենե Կոյինզակին և Երևանի «Զվարթնոց» օդանավակայանում «Ավստրիական ավիաուղիներ»-ի ներկայացուցիչ Նովիկա Մռկովիչին:
Հանդիպման առաջարկը, դատելով հաղորդագրությունից, եղել է հայկական կողմից:
«ՔԱԳՎ պետը կարևոր է համարել Հայաստանի ու Եվրամիության միջև Համապարփակ օդային փոխադրումների մասին համաձայնագիրը, որը կարևոր ազդեցությունը կունենան նաև ՀՀ ավիացիոն շուկայում արդեն երկար տարիներ գործող «Լյուֆթանզա գրուպ» ընկերության «Ավստրիական ավիաուղիներ» և «Բրասելս Էյրլայնզ» ավիաընկերությունների՝ դեպի Հայաստան չվերթների իրականացման ծրագրի ընդլայնման գործում: Գերմանացի գործընկերները ևս իրենց շնորհակալությունը հայտնեցին ակտիվ համագործակցության համար՝ նշելով, որ կուսումնասիրեն հայկական շուկան՝ առավել լայն գործունեություն ծավալելու նպատակով, ինչպես նաև՝ կքննարկեն ցերեկային ժամերին ևս թռիչքներ իրականացնելու հնարավորությունը», գրված է հաղորդագրության մեջ:
Տեղեկությունն անկասկած կարեւոր է եւ հետաքրքիր, հաշվի առնելով Հայաստանի ավիաշուկայում ռուսական ավիաընկերությունների գերազանցությունը եւ փաստացի գերիշխող դիրքը հաղթահարելու, այդպիսով Հայաստանի ավիաշուկայի առաջընթաց ապահովելու, սպառողի համար մատչելիությունը բարձրացնելու հրամայականը: Այդ խնդիրն ունի թե տնտեսական, թե քաղաքական-քաղաքակրթական կարեւոր նշանակություն:
«Լյուֆթհանզա գրուպի» պատվիրակության հանդիպումը ՔԱԳՎ-ում ուշագրավ է մեկ այլ տեսանկյունից:
Բանն այն է, որ, երբ 2016 թվականի հունիսին Հայաստանի քաղաքավիացիայի վարչության նախկին պետ Արտյոմ Մովսիսյանն ազատվեց իր պաշտոնից, դրանից մի քանի շաբաթ առաջ մամուլը գրել էր, որ Սերժ Սարգսյանին տեղեկություն է հասել այն մասին, որ նա կաշառք է պահանջել գերմանական Լյուֆթհանզա ընկերությունից՝ հայկական շուկայում գործունեության կանաչ լույս վառելու համար:
Ըստ լուրի, գերմանական ընկերությունը բողոքել է Հայաստանի իշխանությանը:
Այդ տեղեկությունն իհարկե հերքվեց, եղան նույնիսկ հայտարարություններ, թե ինչպե՞ս կարելի է պատկերացնել կաշառք պահանջել այնպիսի հայտնի եւ խոշոր ընկերությունից, ինչպիսին Լյուֆթհանզան է:
Փաստն այն է, որ կարճ ժամանակ անց՝ 2016-ի հունիսին Արտյոմ Մովսիսյանը ազատվեց պաշտոնից, մինչ այդ 12 տարի լինելով քաղաքավիացիայի գլխավոր վարչության պետ: Այդ ընթացքում հայկական երկնքում տեղի են ունեցել իսկապես ուշագրավ իրադարձություններ, սնանկացել են մի քանի հայկական փոխադրողներ, իսկ ավիաշուկան Հայաստանի գործնականում ռազմավարական դարպաս լինելու պայմաններում իր այսպես ասած մատչելիությամբ կատարել է երեւի թե լրիվ հակառակ դեր՝ փակել է Հայաստանը:
Մովսիսյանին փոխարինեց երիտասարդ Սերգեյ Ավետիսյանը, որը մեկ տարի է գլխավորում է վարչությունը: Այդ ընթացքում հայկական ավիաշուկա է մտել Լյուֆթհանզա գրուպի մաս կազմող «Բրասելս Էյրլայնզ» ավիաընկերությունը՝ Երեւան-Բրյուսել ուղիղ չվերթով:
Արտյոմ Մովսիսյանը ՀՀԿ ռեյտինգային թեկնածու էր եւ իր լուման է ներդրել ՀՀԿ խորհրդարանական «կայուն» միանձնյա մեծամասնության, ձայները քերելու գործում: Դրանից առաջ Մովսիսյանը հայտարարել էր թռչնաբուծական ֆաբրիկա գնելու մասին, ասելով, թե գնել է վարկով:
Իհարկե խորհրդանշական է, որ քաղաքացիական ավիացիայի գլխավոր վարչության 12-ամյա պետը պաշտոնը թողնելուց հետո մտնում է թռչնաբուծական բիզնես: Ավիաշուկան զարգացնել չհաջողվեց, գուցե ինչ որ բան հաջողվի թռչնաշուկայում, նաեւ այսպես ասած ավիաշուկայի փորձից քաղած դասերի շնորհիվ: Ըստ ամենայնի, պատգամավորական մանդատը լրացուցիչ թեւեր կտա Արտյոմ Մովսիսյանին այդ հարցում: