Հայաստանի ազգային հավաքականի բացառիկ և ֆանտաստիկ մրցակիցը

Առաջին լրատվական / Հունիսի 4-ին Վազգեն Սարգսյանի անվան «Հանրապետական» մարզադաշտում ֆուտբոլի Հայաստանի ազգային հավաքականը ստուգողական հանդիպում կանցկացնի Սենտ Քիթս և Նևիսի ընտրանու հետ: Բացի այն, որ այս հանրապետությունը քչերին է հայտնի, այն նաև բացառիկ պետք է համարել: Սենտ Քիթս և Նևիս ֆեդերատիվ հանրապետությունը գտնվում է Կարիբյան ծովի արևելյան հատվածում: Սենտ Քիթսը և Նևիսը տարբեր պետություններ են, որոնց ընդհանուր տարածքը կազմում է ընդամենը 261 ք/կմ, իսկ բնակչությունը 49 հազար է: Որպեսզի այս տվյալներն ավելի պատկերավոր լինեն, նշենք, որ Երևանի մակերեսը կազմում է 223 ք/կմ: Կոպիտ ասած՝ Հայաստանի ազգային հավաքականը մրցելու է թվացյալ 50 հազար բնակչություն ունեցող Երևանի հետ: Սենտ Քիթս և Նևիսը արևմտյան կիսագնդի ամենափոքր պետությունն է: Իր տարածքով էլ այս երկիրը 207-րդն է աշխարհում:

Այս տարի Սենտ Քիթս և Նևիսը որևէ հանդիպում չի անցկացրել: Վերջին հանդիպումը մեր մրցակիցն անցկացրել է 2016 թվականի նոյեմբերին՝ սեփական հարկի տակ 2:0 զիջելով Հայիթիի ազգային թիմին:

Ի դեպ, ՖԻՖԱ-ի դասակարգման աղյուսակում Սենտ Քիթս և Նևիսը բավական բարձր դիրք է զբաղեցնում: Երեկ հրապարակված աղյուսակում մեր մրցակիցը, առաջադիմելով 9 աստիճանով, հանգրվանել է 89-րդ հորիզոնականում: Եթե հաշվի առնենք բնակչության քանակն ու երկրի տարածքը, Սենտ Քիթս և Նևիսի հավաքականի ներկայիս դիրքը ՖԻՖԱ-ի աղյուսակում պետք է ֆանտաստիկ որակել: Անցյալ տարի Սենտ Քիթս և Նևիսին հաջողվել է հաղթել Արուբային, Բերմուդային, Անտիգուա և Բարբուդային, Սուրինամին: Միակ պարտությունը Հայաստանի հավաքականի մրցակիցը կրել է Հայիթիից:

Ի դեպ, Սենտ Քիթս և Նևիսը մրցել է նաև եվրոպական հավաքականի հետ՝ ընկերական խաղում ոչ-ոքի՝ 1:1 խաղալով Էստոնիայի ազգային թիմի հետ: 2015 թվականի նոյեմբերին Սենտ Քիթս և Նևիսը Տալլինում 3:0 հաշվով զիջել է էստոնացիներին, այնուհետև Անդորրայում 1:0 հաշվով առավելության հասել այս երկրի ազգային հավաքականի նկատմամբ:

Նշենք, որ աշխարհի առաջնության ընտրական փուլում Սենտ Քիթս և Նևիսի ազգային հավաքականը ելույթ է ունենում Կոնկակաֆ գոտում: Այս հավաքականում հանդես են գալիս բարձրահասակ և ֆիզիկապես ամուր ֆուտբոլիստներ: Կան ֆուտբոլիստներ, ովքեր ելույթ են ունենում Անգլիայի Չեմպիոնշիփ լիգայում: Գլխավոր թերությունն այն է, որ Սենտ Քիթս և Նևիսի ֆուտբոլիստները բավական դանդաղ են տեղաշարժվում: Նրանք գրոհները զարգացնում են եզրերով՝ հույսը դնելով բարձրահասակ ֆուտբոլիստների երկրորդ հարկում հաջող խաղալու վրա:

Ինչ խոսք, հավանականությունը մեծ է, որ առաջիկա խաղում Հայաստանի ազգային հավաքականը հաղթանակ կտանի համոզիչ հաշվով: Կարծում ենք՝ ակնհայտ է, որ Սենտ Քիթս և Նևիսը խաղաոճով նույնիսկ մոտ չէ Մոնտենեգրոյի ընտրանուն, որի հետ Հայաստանի հավաքականը մրցելու է հունիսի 10-ին: Ունենալով կարգով ավելի թույլ մրցակից՝ մեր ֆուտբոլիստների գլխավոր նպատակը պետք է լինի հատկապես հարձակման գծում տակտիկական սխեմաների փորձարկումն ու բարելավումը:

Նշենք, որ աշխարհի առաջնության եզրափակիչ փուլի ուղեգրի համար պայքարում Մոնտենեգրոյի հետ խաղում մեզ միայն ու միայն հաղթանակ է հարկավոր: Նշենք նաև, որ հարձակման գծում այսօր մեր հավաքականը որոշակի խնդիրներ ունի: Ընտրական փուլի նախորդ հինգ հանդիպումներում մեր հավաքականի հարձակվողներից ոչ մեկին չի հաջողվել գոլ խփել: Ընտրական այս փուլում մեր հավաքականին հաջողվել է խփել 6 գոլ, և այդ բոլոր գնդակները հեղինակել են կիսապաշտպաններն ու պաշտպանները:

Արթուր Պետրոսյանի տրամադրության տակ կան երեք հարձակվողներ՝ Ռուսլան Կորյան, Արթուր Սարկիսով և Էդգար Մանուչարյան: Երևանում կայացած Մոնտենեգրոյի հետ առաջին մրցավեճում Պետրոսյանը մեկնարկային կազմում ընդգրկել էր Կորյանին, ով դարձավ գոլային փոխանցման հեղինակ:

Հայաստան-Մոնտենեգրո հանդիպումը կսկսվի ժամը 20-ին: