Կա՞ «երեւանյան առավոտ», թե արդեն իջել է երեկոն

ԼՐԱԳԻՐ / Օդեսայում կա «Քիշնեւյան առավոտ» արտահայտություն, դա ընդգրկուն արտահայտություն է, որը սահմանում է, թե ինչ հրաշալի քաղաք է Քիշնեւը՝ ուտելիքով հարուստ, որտեղ բացակայում են ազգայնականությունը եւ հակասեմիտիզմը:
Մոլդովայի ներկայիս նախագահին չգիտես ինչու այդքան էլ դուր չի եկել գլոբալիզմը, եւ նա որոշել է դրա դեմ հանդես գալ Ռուսաստանում անցկացվող տնտեսական ֆորումի ժամանակ, որտեղ նախաճաշ են տալիս եւ որին հավաքվել են հոգնած ներկայացուցիչներ ամբողջ աշխարհից:
Մոլդովայի նախագահը խոսել է այն մասին, թե ինչպիսի վնաս է հասցրել գլոբալացումը Մոլդովային, եւ նա իհարկե հույս ունի, որ հրաժարվելով դրանից, Մոլդովան կկարողանա միավորել տարածքները եւ վերադարձնել վերահսկողությունը Պրիդնեստրովիեում:
Լավ, ենթադրենք «Քիշնեւյան առավոտը» մնում է նախկինը, երբ առավոտյան քաղաքում կարելի է լսել կովերի բառաչն ու աքլորների կանչը, իսկ շուկայում կարելի է ձրի գինի փորձել, խոզի խորոված ուտել շատ էժան: Չխոսելով շատ այլ բաների մասին:
Իսկ ի՞նչ անել գլոբալացման հետ: Ժամանակին հրեական վարսավիրանոցում ինչ որ մեկը դեմ էր խոսել Սովետական միությունում այլանդակության դեմ, եւ վարսավիր Մորդեխայը հարցրել էր՝ «Ինչո՞ւ եք կարգուկանոնի համար պայքարը սկսել այս վարսավիրանոցից»:
Կարճ ասած, Մոլդովայի նախագահի ելույթը երեւում է Պուտինին դուր էր եկել եւ երեւի նվիրված էր հենց անձամբ նրան:
Մոլդովան ոչ միայն մոլդովացիները, այլեւ ռուսները թերեւս դիտարկում են որպես արմագեդոն, որտեղ պայքար է լինելու՝ գլոբալիզմի ու լոկալիզմի վերջին ու վճռական կռիվը:
Երեւում է մոլդավ նախագահը միայնակ չէ, եւ լոկալացմանը կողմ է նաեւ Հայաստանի նախագահը: Հնարավոր է արդեն կա նաեւ «Երեւանյան առավոտ», պարզապես մենք դա դեռ չենք նկատել, լսելով հայկական մարգինալ երաժշտություն:
Ի՞նչ է գլոբալացումը եւ ինչու պետք է պայքարել դրա դեմ:
Գլոբալացման դեմ պայքարն ամենեւին էլ տնտեսական պայքար չէ, այլ՝ աշխարհքաղաքական: Այդ ակցիաները, որ ժամանակ առ ժամանակ տեղի են ունենում, նպատակ ունեն ազգային տնտեսությունները հեռու պահել համաշխարհային տնտեսությունից, մարգինալացնել դրանք եւ թույլ չտալ թափանցել համաշխարհային տնտեսություն:
Դասական օրինակ է դարձել Հյուսիսային Կորեան, եւ ահա խաղադրույք է կատարվում «Քիշնեւյան առավոտին»: Ըստ իս, եկել է «Երեւանյան երեկոյի» ժամանակը: