Ադրբեջանում սարսափած են

Politik.am / Ադրբեջանում վերջին շրջանում ներքաղաքական լարված իրավիճակ է: Շաբաթներ առաջ Ադրբեջանում ձերբակալվեցին ավելի քան 48 զինվորականներ, որոնցից 6 ձերբակալությունից հետո սպանվել էին: Այս մասին գրեցին որոշ ընդդիմադիր լրատվամիջոցներ: Նրանց տեղեկացմամբ զինվորականների ձերբակալությունը մեկնաբանվում է, որպես հայկական հատուկ ծառայությունների գործակալական ցանցի բացահայտում: Ադրբեջանում պարբերաբար են տարբեր զինվորականների սպանությունների իրական դրդապատճառները թաքցնելու համար մեղադրում հայկական կողմին: Թվում է, թե Ադրբեջանում ամեն քայլափոխի փորձում են հայկական հատուկ ծառայությունների հետք գտնել:

Օրերս էլ Ադրբեջանում ապաստան գտած Վահան Մարտիրոսյանի հայտարարությունից հետո Ադրբեջանում իրարանցում առաջացավ: Մարտիրոսյանը խոսեց այն իրականության մասին, որը նա տեսել է Ադրբեջանում ապրելու տարիներին: Սա իսկապես սենսացիոն հայտարարություն էր Մարտիրոսյանի կողմից: Այս հայտարարությունից հետո ևս ադրբեջանական կողմը մեղադրեց հայկական հատուկ ծառայություններին, որ հենց հայկական կողմն է Մարտիրոսյանին ստիպել խոսել Ադրբեջանի դեմ:

Ադրբեջանում իսկապես սարսափած են: Երկար տարիներ նրանք իրենց հասարակությանը քարոզում էին, որ Հայաստանը լուրջ պետություն չէ և Ադրբեջանի համար դժվար չէ լուծել հարևան երկրի հարցերը: Իսկ հիմա ամենատարբեր ներպետական սկանդալների հետ կապում են Հայաստանի հատուկ ծառայությունների անունը: Իրավիճակն Ադրբեջանում իսկապես օրհասական է և ամեն վարկյան այդ երկիրը ներսից կարող է պայթել: