Հնգյակից ողջ մնացած երկու փոքրիկների մասին

Երեւանում մայիսի 3-ին լույս աշխարհ եկած հնգյակից ողջ մնացած երկու աղջիկներն այսօր դառնում են մեկ ամսական ու, թեեւ, նրանց կյանքին արդեն վտանգ չի սպառնում, սակայն դեռեւս մեկ ամիս էլ հարկավոր է նրանց բուժման համար։

Հիշեցնենք, որ Երեւանում ծնված հնգյակի՝ տղա եւ չորս աղջիկ, երկու աղջիկն ու տղան ծնվելուց օրեր անց մահացել էին:

Իսկ ողջ մնացած աղջիկներից Աննան, որը գտնվում է Երեւանի «Սուրբ Աստվածամայր» բժշկական կենտրոնում, եւ Ռոզին, որն էլ Մոր եւ մանկան առողջության պահպանման գիտահետազոտական կենտրոնում է («Մարգարյան» հիվանդանոց) դեռ եւս մեկ ամիս էլ կմնան հիվանդանոցում։

«Երեխայի վիճակը նորմալ է, նորություն չկա, Փառք, Աստծուն, վտանգավոր պահերն անցել են, ամեն օր էլ նման քաշի երեխաներ են ծնվում, շատ-շատ են նման դեպքերը, ամեն բան լավ է լինելու, այլեւս անհանգստանալու կարիք չկա»,-armtimes.com-ին տեղեկացրին Մոր եւ մանկան առողջության պահպանման գիտահետազոտական կենտրոնից։

«Սուրբ Աստվածամայր» ԲԿ-ի վերակենդանացման բաժանմունքի վարիչ Աննա Չոբանյանը նույնպես նշում է, որ իրենց մոտ գտնվող փոքրիկի կյանքին վտանգ չի սպառնում։

«Կայուն է երեխայի վիճակը, եւս մեկ ամիս էլ դեռ պետք է ստանան բուժում, որ ապահով լինենք, այս պահին կարող ենք ասել, որ ամեն բան նորմալ է, մի քիչ էլ կկայունանա, կգան կստուգեն աչքերը, առաջինը ստուգում ենք աչքերը, հետո լսողությունը եւ այդպես արդեն կամաց-կամաց ամեն բան նորմալ կլինի»,-ասաց բժշկուհին։

Երեկ էլ տեղեկացրել էինք, որ Մեծամորի հանրակացարանում ապրող երեխաների ծնողներին Մայր Աթոռ Սուրբ Էջմիածնի խոստացած բնակարանի գնման գործընթացն արդեն ավարտվել է, եւ մնում է նրանք ստանան սեփականության վկայականը: