ԱՄՆ-ի զգուշացումը Հայաստանին

Լրագիր / ԱՄՆ նախագահ Դոնալդ Թրամփը շնորհավորել է Վրաստանին Անկախության օրվա կապակցությամբ։ «Անկախության ձեռքբերումից հետո Վրաստանը տարածաշրջանում դարձել է առաջատարը ժողովրդավարության ոլորտում, ինչը օգուտ է տալիս միջազգային անվտանգությանը: Վրաստանը շարունակում է գնալ իր ուղենշած ճանապարհով՝ անտեսելով արտաքին ճնշումները», ասել է նա։ Նա նաև հայտնել է, որ ԱՄՆ-ն կշարունակի պաշտպանել Վրաստանի ինքնիշխանությունը։
Կար ժամանակ, երբ տարածաշրջանում Հայաստանն էր ժողովրդավարության առաջատարը կամ «կղզյակը»: Ընդ որում, այդ գնահատականը հնչել էր նորանկախ Հայաստանի առաջին ծանր տարիներին, պատերազմի ժամանակ:
Այդ պատերազմը, չնայած անասելի դժվարություններին, Հայաստանն ու Արցախը հաղթեցին, քանի որ այն ժողովրդավարության, ինքնիշխանության ու իրավունքի պայքար էր, համահունչ՝ քաղաքակրթական զարգացմանը, որը միջազգային անվտանգության կարեւոր ձեռքբերումն էր մեր տարածաշրջանում: Դա նորի ու առաջադեմի հաղթանակն էր հետամնաց ու հակամարդկային համակարգի հանդեպ, եւ նաեւ այդ պատճառով հնարավոր դարձավ ու լեգիտիմացվեց:
Այդ տարիներին, ընդհակառակը, Վրաստանում քաոս ու անիշխանություն էր, եւ ընդհանրապես խոսք չէր կարող լինել պետականության, պետական ինքնիշխանության ու ժողովրդավարության մասին: Վրաստանը կորցնում էր ամեն ինչ:
Անցան տարիներ, Հայաստանում մսխվեց այն ամենը, ինչը մեր ժողովրդի անօրինակ հերոսության, ապագայի հանդեպ հավատի արգասիքն էր: Հաղթանակից հետո երկիրը հանձնվեց ռազմական օլիգարխիայի, այնուհետեւ քրեական օլիգարխիայի տիրապետությանը: Արդեն ներքին կյանքում ազատությունից, իրավունքից ու քաղաքակրթական համարժեքությունից աստիճանաբար ոչինչ չմնաց, ոչնչացվեց Սահմանադրական կարգը, եւ ամենակարեւորը՝ ժողովրդի հավատն ու մոտիվացիան, որը ցանկացած առաջընթացի հիմքն է:
Հայաստանը ներկայում կրկին հայտնվել է հակաքաղաքակրթական բեւեռում, իսկ Վրաստանն ահռելի թռիչք է կատարել այդ համակարգից ազատվելու ուղղությամբ: Այդպիսով, Վրաստանը հայտնվել է այն բեւեռում, որը կերտում է նոր աշխարհակարգը՝ դրանից բխող պրեֆերենցիաներով՝ անվտանգության ու տնտեսական ոլորտներում:
Եվ հակառակը, Հայաստանը հայտնվել է մի բեւեռում, որը դառնալու է նոր աշխարհակարգի կերտման «օբյեկտը»՝ դրանից բխող հետեւանքներով: Տնտեսության ու անվտանգության ոլորտում Հայաստանն արդեն զգում է այդ հետեւանքները:
Թրամփի շնորհավորանքը Վրաստանին բաց տեքստով ակնարկ ու նաեւ զգուշացում է Հայաստանին, որը տեղի տալով արտաքին ճնշմանը՝ «ընտրել» է մի համակարգ, որը դուրս է միջազգային անվտանգության ու ինքնիշխանության սահմաններից: