13:02 - Իրանական Mehrnews-ի փոխանցմամբ ահաբեկչության պատճառով մեջլիսի նիստը այս ընթացքում չի ընդհատվել եւ ավարտվել է մոտ 20 րոպե առաջ:
Իրանական ԶԼՄ-ներում նաեւ տարբեր լուսանկարներ են հայտնվում այսօր առավոտ Իրանում միաժամանակ երկու ուղղությամբ կատարված ահաբեկչական գործողություններից:
Լուսանկարում`խորհրդարանի տարածքում ահաբեկչի բացած կրակից վիրավորված տղամարդ
12:45-Իրանական տարբեր լրատվամիջոցների հաղորդմամբ խորհրդարանի շենքի 4-րդ հարկում գտնվող ահաբեկիչն պայթեցրել է իրեն:
Տեղեկություններ կան, որ դամբարանի ահաբեկիչներից 3-ը կին է եղել, այդ թվում նաև` իրեն պայթեցրած մահապարտ-ահաբկիչը: Երկու հոգի ձերբակալվել են, ևս մեկն էլ սպանվել ոստիկանական ուժերի հետ ունեցած փոխհրաձգության հետևանքով: Որոշ արաբական կայքեր սկզբում տեղեկացրել են, որ հարձակումների պատասխանատվությունը իր վրա է վերցրել ԻԳԻԼ-ը, սակայն որոշ ժամանակ հետո հեռացրել են այդ նյութերը իրենց կայքերից:
12:39- Իրանի ներքին գործերի նախարարը հայտնել է, որ հարձակումների կապակցությամբ արտակարգ նիստ են հրավիրում Թեհրանում: Նախարարը պաշտոնապես հաստատել է, որ կատարվածը ահաբեկչություն է: Նշվում է, որ Իրանի խորհրդարանում իրավիճակը գտնվում է ներքին գործերի նախարարության վերահսկողության ներքո:
12:28- Tasnim news-ի տեղեկություններով Իրանի խորհրդարանում զոհերի թիվը հասել է 7-ի: Չհաստատված տեղեկություններ կան, որ Թեհրանի մետրոյի կայարաններից մեկում նույնպես կրակոցներ են հնչել:
12:12- Իրանական «Mehrnews»-ը հաղորդում է, որ այս պահին խորհրդարանի շենքի հարկերից մեկում ամենաքիչը մեկ ահաբեկիչ է թաքնված: Մեկ այլ հարկում երկու ահաբեկիչ շրջափակման մեջ են անվտանգության ուժերի կողմից:
Ահաբեկիչներից մեկը, ըստ նույն աղբյուրի` դուրս է եկել խորհրդարանից եւ կրակ բացել անցորդների վրա, ովքեր պառկել են գետնին եւ փորձել պաշտպանվել:
11:45- Արդեն հայտնել ենք, որ այս առավոտյան Իրանի Խորհրդարանում ազգային անվտանգության և արտաքին քաղաքականության նիստի ժամանակ 4 հոգի «Կալաշնիկով» ավտոմատներով զինված ներխուժել են դահլիճ եւ հրաձգություն սկսել: Նրանք սպանել են անվտանգության աշխատակիցներից մեկին:
BBC-ի հաղորդմամբ` 7 կամ 8 հոգի վիրավորվել են:
Միաժամանակ այսօր հարձակում է տեղի ունեցել Իմամ Խոմեյնիի դամբարանում: Տեղեկությունների համաձայն՝ հարձակվողներից երկուսը ձերբակալվել են, մեկը պայթեցրել է իրեն: Նախնական տեղեկություններով՝ դամբարանում տեղի ունեցած կրակոցների հետևանքով վիրավորվել է 5 մարդ, մեկը՝ զոհվել է:
Guardian-ի փոխանցմամբ` խորհրդարանի եւ դամբարանի վրա հարձակումները նախապես կազմակերպված են եղել եւ միաժամանակ են իրագործվել: Երկու դեպքում էլ ահաբեկիչները 3-4 հոգի են եղել:
Ըստ իրանական «PressTV»-ի` դամբարանի վրա հարձակված երեք անձանցից մեկը պայթեցրել է ինքն իրեն, երկրորդը`սպանվել, իսկ երրորդը` վիրավորվել:
Լուսանկարում` JamaranNews-ի լուսանկարիչը որսացել է Դամբարանի արեւմտյան մուտքի պայթյունը
Լրատվամիջոցը նշում է նաև, որ ահաբեկչության վայրում գտնվել է մեկ այլ պայթուցիկներով լի գոտի, որը, ամենայն հավանականությամբ, պետք է ծառայեր վնասազերծված ահաբեկիչներից մեկին:
1
2
3
4
5
2
3
4
5
2
3
4
