Ինչ է կատարվում Իրանում այս պահին

Այսօր առավոտյան Թեհրանում երկու ծրագրված ահաբեկչական հարձակում է եղել, որոնցից մեկը՝ Իրանի խորհրդարանի՝ Մեջլիսի շենքի, մյուսը՝ Իմամ Խոմեյնիի դամբարանի վրա: Դամբարանի տարածքում հարձակումը իրականացրել է 3-4 հոգանոց խումբը: Նրանցից մեկը կին է եղել, որն իրեն պայթեցրել է դամբարանի արևմտյան բակում: Հարձակվողներից երկուսը ձերբակալվել են: «Առաջին լրատվական»-ի հետ զրույցում այս տեղեկությունները հաղորդեց Թեհրանում տպագրվող «Արաքս» շաբաթաթերթի խմբագիր Մովսես Քեշիշյանը:

Խոսելով խորհրդարանի վրա կատարված հարձակման մասին՝ մեր զրուցակիցը նշեց, որ հարձակվողները չորսն են եղել, որոնցից մեկը պայթեցրել է իրեն հարձակման ժամանակ, իսկ երեքը դեռևս շարունակում են զինված դիմադրությունը: Մովսես Քեշիշյանը չհաստատեց այն տեղեկությունները, որ ահաբեկիչները պատանդ են վերցրել խորհրդարանի պատգամավորներին՝ ասելով, որ նրանք նիստերի դահլիճ չեն մտել, հարձակումը եղել է Մեջլիսի գրասենյակային բաժինների վրա:

«Փոխադարձ կրակոցները դեռ շարունակվում են, և փաստորեն դեռևս ավարտված չէ քաշքշուկը խորհրդարանի սահմաններում, բայց ընդհանուր հսկողության ներքո է, հարձակվողները շրջափակված են անվտանգության ուժերի կողմից: Մինչ այս վիրավորներ եղել են, կան ավելի քան 30 վիրավորներ, 2 զոհ կա հասարակությունից, զոհվել է նաև խորհրդարանի պաշտպաններից մեկը: Շտապօգնության կենտրոններից տրված լուրերում հստակ խոսք չկա նոր զոհերի մասին: Հավանական է, որ զոհերի թիվը մի քիչ ավելանա՝ նկատի ունենալով, որ ահաբեկիչները ուղղակիորեն կրակել են ժողովրդի վրա: Զրույցներ կան 7-8 զոհերի մասին, բայց ես այս պահին չեմ կարող հստակ թիվ ասել: Հնչում են տարբեր տեղեկություններ՝ առանց հստակ աղբյուրների: Պետք է սպասել և տեսնել: Երկրի անվտանգության նախարարությունը հայտարարել է, որ հարձակվողների խմբերը երկուսից ավելին են եղել, մյուսները ձերբակալվել են Թեհրան մուտք գործելիս»,- մեկնաբանեց Մովսես Քեշիշյանը:

Խոսելով ընդհանուր իրադրության մասին՝ Քեշիշյանը նշեց, որ Թեհրանում խուճապային իրավիճակ կամ լարվածություն չկա ահաբեկչական հարձակումներից հետո, իրադրությունը խաղաղ է:

«Ոչ, ոչ, քաղաքն իր բնականոն կյանքով է ապրում: Խորհրդարանը նույնիսկ իր նիստը շարունակել և ավարտել է, նույնիսկ տագնապ չի ստեղծել խորհրդարանում: Ամեն դեպքում Իմամի դամբարանի տարածքում բաց կրակոցներ են եղել, հետո՝ պայթյուն, և բնական է՝ մարդիկ դրանից զգուշացել են: Այնտեղ էլ մեկ քաղաքացի է զոհվել»:

Թեհրանում իրականացված հարձակումների պատասխանատվությունը, ըստ «Ֆրանս պրես» լրատվական գործակալության, ստանձնել են Լիբիայում ԴԱԻՇ ահաբեկչական խմբավորման ներկայացուցիչները: