Պուտինյան ռեժիմը կճաքի, մենք շուտով դա կտեսնենք

Երեկ ԱՄՆ օրենսդիր պալատում սկսվել է Հետաքննությունների դաշնային բյուրոյի նախկին տնօրեն Ջեյմս Քոմիի հարցաքննությունը, որի ժամանակ Քոմին նորից հայտարարել է, որ ռուսները միջամտել են ամերիկյան ընտրություններին: Ի՞նչ հետևանքներ կունենա Քոմիի հարցաքննությունը ԱՄՆ օրենսդիր պալատում: Թեմայի շուրջ «ԱՌԱՋԻՆ»-ը զրուցել է այդ իրադարձություններին հետևող Տիգրան Խզմալյանի հետ:

– Պարոն Խզմալյան, ի՞նչ հետևանքներ կունենա Քոմիի հարցաքննությունը ԱՄՆ օրենսդիր պալատում:

– Միացյալ Նահանգները աշխարհի ժամանակակից ժողովրդավարությունն է, որը ստեղծվել է Ֆրանսիական հեղափոխության գաղափարներով, բայց փաստորեն ավելի շուտ, քան Ֆրանսիական Հանրապետությունը: Իսկ թե ինչ ազդեցություն կունենա այն օրենսդիր պալատում, պետք է նկատի ունենալ մի քանի բարդ հանգամանքներ: Մի կողմից՝ այն, ինչ ասաց Քոմին, արդեն բավական է, որպեսզի Կոնգրեսում նախագահի հրաժարականի պահանջ դրվի, և դա արդեն դրվել է: Երկու անգամ կոնգրեսական դեմոկրատ Գրինը Տեխաս նահանգից նման հայտարարություն արեց: Նա չի ներկայացնում Հանրապետական կուսակցության հիմնական առաջնորդներին, բայց այստեղ պետք է նկատի ունենանք երկրորդ հանգամանքը. 20-րդ դարի 20-ականներից հետո Միացյալ Նահանգներում եզակի իրավիճակ ստեղծվեց, երբ բոլոր մեծամասնությունները պատկանում էին մի կուսակցության, տվյալ դեպքում՝ հանրապետականներին՝ և՛ Կոնգրեսը, և՛ Սենատը, և՛ դատարանը, և՛ Սպիտակ տունը: Նույնը կրկնվեց հարյուր տարի անց՝ Թրամփի օրոք: Եվ բավական բարդություններ են ստեղծվում: Մի կողմից՝ ստեղծվել է պարադոքսալ վիճակ, երբ դեմոկրատները հիմա չեն շտապում Թրամփի հրաժարականի պահանջը դնել հետևյալ պատճառներով. 2018-ին տեղի են ունենալու Կոնգրեսի ընտրությունները, և դեմոկրատները շահագրգռված են, որ այս սկանդալային հետաքննությունը և լսումները ընթանան, որքան հնարավոր է, երկար՝ հասնելով 2018 թվական, որպեսզի ոչ միայն Թրամփին փոխեն, այլև ամբողջ մեծամասնությունը Կոնգրեսում և հնարավորության դեպքում՝ նաև դատական ատյաններում: Այսինքն՝ դեմոկրատները դնում են մաքսիմալ խնդիր, որովհետև եթե փոխվի միայն Թրամփը, փաստորեն Հանրապետական կուսակցությունը կշարունակի լինել մեծամասնություն, և նախագահ կդառնա փոխնախագահ Փենսը: Մյուս կողմից՝ հանրապետականները գիտակցում են, թե ինչ վտանգի առջև են կանգնած՝ կորցնելով ամբողջ իշխանությունը: Նրանք նաև հասկանում են՝ Թրամփի հրաժարականը նախաձեռնելը իրենց համար նույնպես շատ վտանգավոր է, այսինքն՝ իրենք անմիջական և հետաձգված վտանգների միջև են տատանվում: Սա ստեղծում է բավական խճճված իրավիճակ Միացյալ Նահանգներում: Ահա թե ինչու Քոմիի հայտարարությունը որքան էլ վտանգավոր է Թրամփի համար, որքան էլ բավական է հրաժարականի համար, կարող է դեռևս չդառնալ այն վերջին կրակոցը, որից կսկսվի Թրամփի հրաժարականի գործընթացը:

շարունակությունը՝ այստեղ