Շպիոնական կրքեր հայկական հողի վրա

Shame.am-ը գրում է․

Վերջին օրերին համացանցում իրար հետևից հայտնվեցին հրապարակումներ, որոնց հեղինակները, հանդես գալով, ինչպես իրենք են ասում, Ռուսաստանի հայ համայնքի անունից, Հայաստանում ԱՄՆ դեսպանատան մի շարք աշխատակիցների մեղադրեցին երկրում զինված անկարգություններ խրախուսելու, հայկական պետականության հիմքերը խարխլելու մեջ: Հրապարակվեցին նաև մի շարք դիվանագետների անձնագրային տվյալներ: Բացի այդ, Հայաստանի որոշ քաղաքական գործիչներ, ընդ որում, ինչպես իշխանական, այնպես էլ ընդդիմադիր, հրապարակումներում մեղադրվում էին ԱՄՆ «գործակալներ» լինելու մեջ: Այդ ցանկին են դասվում նաև բազմաթիվ հասարակական կազմակերպություններ ու լրատվամիջոցներ:

Իսկ այսօր ԱԳՆ մամլո խոսնակ Տիգրան Բալայանը վերջապես արձագանքեց կատարվածին ու հայտարարեց. «Դա սադրանքի տպավորություն է թողնում։ Այդ անընդունելի արարքը չի կարող վնաս հասցնել Հայաստան–Միացյալ Նահանգներ ամուր բարեկամական գործընկերությանը»։ Սակայն ԱԳՆ արձագանքում ոչ մի խոսք չկա այն մասին, թե հիշյալ սադրանքը որքանով կարող է վնասել ներհայկական միջավայրը, մինչդեռ դա ներկա պահին կարող է շատ ավելի մտահոգիչ լինել: Բացի այդ, թե ով և երբ է տեսել հայ-ամերիկյան բարեկամության մի դրական արդյունք՝ նույնպես անհայտ է (բարեկամության այդ արդյունքներն առայժմ վառ դրսևորվել են Վրաստանում, Ուկրաինայում, Մոլդովայում, տա Աստված, որ շատ շուտ դրսևորվեն նաև Ադրբեջանում, և Աստված կարոտ պահի, որ դրսևորվեն Հայաստանում)։

Սա նոր բան չէ. Հայաստանում գործող որոշ գործիչների ու կառույցների վաղուց պիտակավորել են: Դրանց մի մասը Կրեմլի գործակալներ են, մյուսները՝ ամերիկացի շպիոններ: Այսպես շատ հարմար է: Հենց որևէ մեկը հակառակ տեսակետ է արտահայտում, անմիջապես նրան վերագրում են օտարին ծառայելու դավաճանական հանցանքը: Արդյունքում՝ սահմաններն ավելի են մեծացել, ու ստացվել է այնպես, որ հայկական սփյուռքը ծառայեցվում է իբրև գործիք միջպետական հարաբերություններ հստակեցնելու և ազդեցության գոտիներն ընդարձակելու նպատակով: Մի խոսքով, «շպիոնները» ծառայում են գերտերություններին: Իսկ ո՞վ պիտի ծառայի Հայաստանի Հանրապետությանը: