ՆԱՏՕ-ի հետաքրքիր առաջարկը Հայաստանին

Առաջին / ՆԱՏՕ-ի գլխավոր քարտուղարի հատուկ ներկայացուցիչ Ջեյմս Ապատուրայն ԱԺ նախագահ Արա Բաբլոյանի հետ հանդիպմանը հայտարարել է, որ առաջիկայում կլինեն Հայաստանի համար հետաքրքրություն ներկայացնող նոր ծրագրեր: Ապատուրայի խոսքում չկան մանրամասներ, թե արդյո՞ք ծրագրերը միայն Հայաստանի համար են, թե՞ դրանք ունենալու են ընդհանուր բնույթ, որում կլինի նաև Հայաստանի համար հետաքրքրություն: Հատկանշական է այն, որ մի քանի տարի առաջ ՆԱՏՕ-ի գլխավոր քարտուղարի հատուկ ներկայացուցչի շուրթերից հնչել էր հայտարարություն, որ հյուսիսատլանտյան դաշինքը գործնականում առանձին մոտեցումներ է ունենալու Վրաստանի, Հայաստանի ու Ադրբեջանի նկատմամբ: Դա ռացիոնալ վերաբերմունք է, որովհետև համարժեք չէ երեք կովկասյան երկրներին միասնական մոտեցմամբ կամ պրիզմայով դիտարկելը:

Հետևաբար պետք է ենթադրել, որ Ապատուրայի հայտարարությունը կարող է նշանակել Հայաստանին արվելիք հնարավոր նոր առաջարկներ: Առաջին հերթին, այստեղ, իհարկե, ուշագրավ է այն, որ այդ մասին հայտարարվում է մի սպասման ֆոնին, որն առնչվում է Հայաստան-ԵՄ շրջանակային նոր համաձայնագրին: Ի դեպ, դրա ստորագրման կարևորության մասին խոսել է նաև Ապատուրայն իր երևանյան հանդիպումների ընթացքում: Համաձայնագիրը բանակցված է, ավարտված և նախաստորագրված: Ստորագրումը սպասվում է աշնանը՝ Բրյուսելում: Թվում է, որ չկա որևէ խնդիր, առավել ևս, որ խոսքն ամենևին Ասոցացման մասին չէ և Ռուսաստանը այսպես ասած «խանդելու» տեղ չունի, թեև այս դիտարկումն ինքնին վիրավորական է ինքնիշխան որևէ պետության համար: Բայց ունենք այն, ինչ ունենք, և այստեղ խնդիրը, իհարկե, միայն Ռուսաստանի «խանդը» չէ Հայաստանի հանդեպ, այլ այն, որ Ռուսաստանը Հայաստանը կարող է օգտագործել իբրև խաղաքարտ Արևմուտքի հետ իր հարաբերություններում: Այսինքն՝ Ռուսաստանը կարող է խանգարել Հայաստան-ԵՄ համաձայնագրի ստորագրմանը ոչ թե այն մտավախությամբ, որ Հայաստանի համար դա կլինի քայլ դեպի Արևմուտք, այլ պարզապես Արևմուտքին այսպես ասած տհաճություն պատճառելու համար:

շարունակությունը՝ կայքում