«Լացս գալիս է, հայերի չափ էլ չկանք». ադրբեջանցի մարզչի վայնասունը

1in.am / Վերջին շրջանում Մոսկվայի «Արարատ» ֆուտբոլային ակումբի զարգացումն ու վերելքը հիվանդագին արձագանք են գտել Ադրբեջանում: Բանն այն է, որ գոյություն ունի նաև Մոսկվայի «Ղարաբաղ» ֆուտզալի թիմ, որը, սակայն, Ռուսաստանում ադրբեջանական համայնքի կողմից անուշադրության է մատնված և լուծարման եզրին է:

Հիշեցնենք, որ Մոսկվայի «Արարատը» Ռուսաստանի երկրորդ դիվիզիոնում հանդես գալու լիցենզիա է ստացել, ինչպես նաև ակտիվ տրանսֆերային քաղաքականություն է վարում՝ հրավիրելով նաև ճանաչված ֆուտբոլիստների: Մասնավորապես, «Արարատի» հետ պայմանագիր են կնքել Ռուսաստանի ազգային հավաքականի նախկին առաջատար ֆուտբոլիստներ Ռոման Պավյլուչենկոն և Մարատ Իզմայիլովը:

«Սիրտս մրմռում է «Արարատի» համար, լացս գալիս է: Ամոթ է, հայերը լուրջ նպատակներ են դրել իրենց առջև, ստեղծում են համազգային թիմ, իսկ մենք… Հայերի չափ էլ չկանք, ամոթ է: Պետք է լուրջ քայլեր ձեռնարկենք, փրկենք «Ղարաբաղը», այն ևս համազգային թիմ դարձնենք: Ես դիմում եմ Ռուսաստանում բնակվող բոլոր ադրբեջանցիներին, խնդրում եմ օգնեք «Ղարաբաղին»,- հայտարարել է Մոսկվայի «Ղարաբաղի» խաղացող-մարզիչ Էլնուր Վելիևը:

Վերջինս հավելել է, որ երբեք չի թողնի «Ղարաբաղը», և որքան էլ ծանր լինի, իր թիմին փորձելու է դուրս բերել ճգնաժամային վիճակից: Նշենք, որ «Ղարաբաղը» նախորդ մրցաշրջանում ելույթ է ունեցել Մոսկվայի առաջնության Արևմուտք դիվիզիոնում:

«Ռուսաստանի երրորդ դիվիզիոնում հանդես գալու համար մեզ անհրաժեշտ է 4-5 միլիոն ռուբլի, որը չունենք: Նշեմ, որ «Արարատի» տարեկան բյուջեն կազմում է 240 միլիոն ռուբլի: Տեղս չեմ գտնում, շատ ամոթ է: Որպես հայրենասեր՝ միակ մխիթարությունս այն է, որ Աղդամի «Ղարաբաղը» մի քանի անգամ ավելի ուժեղ է Երևանի «Արարատից»: Մեր «Ղարաբաղը» վերջին երեք տարիներին հանդես է եկել Եվրոպա լիգայի խաղարկության խմբային փուլում, իսկ «Արարատը» եվրագավաթների խաղարկությանը վերջին անգամ մասնակցել է 9 տարի առաջ և դուրս մնացել առաջին իսկ որակավորման փուլից»,- նշել է Վելիևը:

Ի դեպ, Մոսկվայի «Ղարաբաղի» գլխավոր մարզիչը պատրաստ է Մոսկվայում բնակվող ադրբեջանցի խոշոր գործարարների ոտքերն ընկնել, որպեսզի իր թիմի համար գումար ստանա: «Մոսկվայում բազմաթիվ ադրբեջանցի գործարարներ կան: Ինչու չէ, ես կընկնեմ նրանց ոտքերը, որպեսզի օգնեն «Ղարաբաղին»: Ես կդարձնեմ «Ղարաբաղը» համազգային թիմ, կտեսնեք: Այն ոչնչով չի զիջի Մոսկվայի «Արարատին» և նույնիսկ կարգով կգերազանցի նրան: Ժամանակի խնդիր է: Հայերը կարողացան մի քանի օրում աղմկոտ տրանսֆերներ իրականացնել, մեզ մոտ էլ կստացվի, վստահ եմ»,- նշել է Մոսկվայի «Ղարաբաղի» գլխավոր մարզիչը:

Նշենք, որ Մոսկվայի «Ղարաբաղը» հիմնվել է 2013 թվականին: Այս թիմում հանդես են գալիս սիրողական մակարդակի խաղացողներ: «Ղարաբաղը» իր առջև երբեք նպատակ չէր դրել հանդես գալու ավելի բարձր դիվիզիոններում: Այս թիմի մասին հիշատակումներ չկային ադրբեջանական մամուլում, և հարևան երկրում ֆուտբոլասերներից քչերին էր հայտնի, որ գոյություն ունի նման ֆուտբոլային ակումբ: Թիմը չունի պաշտոնական կայք, իսկ «Вконтакте» սոցիալական ցանցում ադրբեջանական թիմն ունի ընդամենը 300 հետևորդ:

Տևական ժամանակ «Ղարաբաղը» փնտրում էր ադրբեջանցի հուսալի դարպասապահ: Այսօր թիմի դարպասը պաշտպանում է ռուս 50-ամյա դարպասապահ Անդրեյ Տվերյակովը: Մոսկվայի «Արարատի» ստեղծվելուն պես, չգիտես ինչու, ադրբեջանցիների մեջ արթնացավ ամոթի զգացում: Մոսկվայի «Արարատի» հաջողությունների համար լաց լինելը և ամոթի զգացում ապրելը ոչ այլ ինչ է, քան մառազմ: Ֆուտբոլային թիմը ստեղծվում է հաղթանակի, նվաճումների և այլ մարզական նպատակների իրագործման համար: «Ղարաբաղի» մարզիչը առաջարկում է ուժեղացնել իր թիմը, որպեսզի ինչ-որ բան ապացուցի, մասնավորապես, հայերին: Իսկ թե ինչ արդյունք կտա Վելիևի՝ ադրբեջանցի գործարարների ոտքերի տակ ընկնելը՝ ցույց կտա ժամանակը: