Ուկրաինայում միջազգային հաքերային խմբավորումը ԱՄՆ-ի և Եվրոպայի քաղաքացիներից 100 միլիոն դոլար է հափշտակել

Ուկրաինայում գործող միջազգային հաքերային խմբավորումը կիբերհարձակումներ է իրականացրել Եվրոպայի երկրների և ԱՄՆ-ի քաղաքացիների ու ընկերությունների նկատմամբ. հանցագործներին հաջողվել է նրանցից կորզել ավելի քան 100 միլիոն դոլար: Այս մասին Telegram-ալիքում հայտնել է Ուկրաինայի գլխավոր դատախազ Ռուսլան Կրավչենկոն:

Քննության տվյալներով՝ հաքերները հասանելիություն են ստացել զոհերի գաղտնի տեղեկատվությանն ու փաստաթղթերին, իսկ ավելի ուշ փրկագին են պահանջել դրանք վերադարձնելու կամ չհրապարակելու համար: Շանտաժի օգնությամբ նրանք կարողացել են կորզել 100 միլիոն դոլար: Այդ գումարներով հաքերները հասցրել են անշարժ գույք և այլ թանկարժեք գույք գնել Ուկրաինայում:

Ընդհանուր առմամբ, հետաքննության շրջանակներում իրականացվել է ավելի քան 30 խուզարկություն: Հանցակիցներից մեկին, ով պատասխանատու էր գողացված գումարների կանխիկացման և լեգալացման համար, դատարանը կալանավորել է՝ գրավի դիմաց ազատ արձակվելու իրավունքով: Այնուամենայնիվ, կալանք է դրվել ակտիվների վրա, ներառյալ՝ բնակելի տներ, բնակարաններ, ավտոմեքենաներ, ինչպես նաև 1 միլիոն դոլար կանխիկ գումար և մոտ 8,3 միլիոն դոլարի կրիպտոարժույթ:

Ավելի վաղ այս գործով մեղադրանքներ էին ներկայացվել կազմակերպիչներից մեկին, ով թաքնվում էր օտարերկրյա արդարադատությունից, և սխեմայի ևս մեկ մասնակցի: