Սարգսյանը որոշել է, Վլադիմիր Գասպարյանը դիմադրում է

Newsbook /  Բոլորովին վերջերս հայտնի դարձավ, որ ՀՀ վարչապետ Կարեն Կարապետյանը հանձնարարել է կառուցվածքային լուրջ փոփոխություններ իրականացնել կառավարությունում: Համապատասխան հանձնարարականներ վարչապետը տվել է գերատեսչությունների ղեկավարներին: 

Զուգահեռաբար NewsBook-ին հայտնի դարձավ, որ կառավարության կառուցվածքային փոփոխությունների հարցը քննարկվել է նաև Բաղրամյան 26-ում: Սերժ Սարգսյանի մերձավոր շրջանակից փոխանցում են, որ վերջինս հստակորեն որոշել է վերակազմավորել ՀՀ ոստիկանությունն ու Արտակարգ իրավիճակների նախարարությունը: Համաձայն Սարգսյանի որոշման՝ շատ մոտ ապագայում ՀՀ ոստիկանությունն ու Արտակարգ իրավիճակների նախարարությունը կմիացվեն իրար, իսկ սուպեր կառույցը կկոչվի Ներքին գործերի նախարարություն: Այսպիսով կփոխվեն Արտակարգ իրավիճակների նախարարության և ՀՀ ոստիկանության կարգավիճակները, բնականաբար՝ դրանց առաջին դեմքերինը՝ ևս: Նախարար Դավիթ Տոնոյանն ու ՀՀ ոստիկանապետ Վլադիմիր Գասպարյանը կաշխատեն մեկ նախարարի ենթակայության ներքո: Սա, իհարկե, լավագույն դեպքում, որովհետև դեռ հայտնի չէ, թե ում է վստահվելու նոր նախարարությունը, ըստ այդմ՝ ի՞նչ պատկերացումներով կամ թիմով է կառավարելու նորանշանակ նախարարը:

Մեր տեղեկություններով այս ծրագրին որոշակիորեն դիմադրում է Վլադիմիր Գասպարյանը, որը չի պատկերացնում իր աշխատանքը նախարարի ենթակայության կամ վերադասի առկայության պայմաններում: Այս օրերին Գասպարյանն, ի տարբերություն ԱԻՆ նախարար Դավիթ Տոնոյանի, ձեռքերը ծալած չի նստել: Մասնավորապես նա հանձնարարել է ՀՀ ոստիկանության Իրավաբանական վարչության գլխավոր ու որակյալ մասնագետներին գտնել իրավական հիմքեր, թե ինչու համար Հայաստանի դեպքում չի կարող արդարացված լինեկլ ոստիկանության կարգավիճակի փոփոխությունն ու ոստիկանապետի լիազորությունների սահմանափակումները:         

Սերժ Սարգսյանի շրջապատից, սակայն, փոխանցում են, որ որոշումն անբեկանելի է, քանի որ Սարգսյանին մանրամասն ներկայացվել են այլ երկրների օրինակներն ու միջազգային փորձը, ինչպես նաև համապատասխան վերլուծություն, թե ինչու է անհրաժեշտ իրականացնել կառուցվածքային այսօրինակ փոփոխություն: