Կապդեւիլան Երեւանում է

Armtimes.com / «Վիլյառեալի» եւ Իսպանիայի ֆուտբոլի ազգային հավաքականի նախկին պաշտպան Խուան Կապդեվիլան, որը խաղում է Անդորայի չեմպիոն «Սանտա Կոլոմայում», կրկին Հայաստանում է: Ինչպես անցած մրցաշրջանում, այս անգամ էլ նա կփորձի շրջանցել Հայաստանի չեմպիոն «Ալաշկերտին»: Այսօր՝ հունիսի 26-ին, լրագրողների հետ հանդիպման ժամանակ նա իր կարծիքն արտահայտեց առաջիկա մրցակցի մասին:

«Մի փոքր ուսումնասիրել ենք մրցակցին, նաեւ ունենք նրանց դեմ խաղալու անցած տարվա փորձը: «Ալաշկերտում», նախորդ տարվա համեմատ, փոփոխություններ կան: Մենք էլ խաղին մոտեցել են նախորդ տարվա դասը սովորած: Պատրաստվում ենք բարդացնել մրցակցի կյանքը, որովհետեւ կարծում եմ՝ հիմա ավելի ուժեղ ենք եւ կունենանք մեր հնարավորությունները թե վաղվա խաղում, եւ թե դիմակայությունում: Վաղը փորձելու ենք լավ խաղ ցուցադրել եւ մեզ բավարարող հաշվով ավարտել հանդիպումը, որովհետեւ բացի վաղվանից՝ կա նաեւ պատասխան խաղը»,- ասաց նա:

Իսպանացի ֆուտբոլիստը նաեւ նկատեց, որ հայկական ֆուտբոլը մեծ առաջընթաց է գրանցել վերջին տարիների ընթացքում: Նա ընդգծեց, որ հայկական ֆուտբոլը զարգանում է համաշխարհային ֆուտբոլին զուգընթաց:

«Ինչպես բոլոր փոքր երկրների, այնպես էլ հայկական ֆուտբոլը շատ է զարգացել: Ֆուտբոլն անընդհատ աճում է, եւ շատ լավ է, որ փոքր երկրների թիմերը կարողանում են պայքարել գերտերությունների դեմ: Հայկական ֆուտբոլն էլ շարունակում է աստիճանաբար ուժեղանալ»,- ասաց նա:

Մամուլի ասուլիսին ներկա էր նաեւ «Սանտա Կոլոմայի» գլխավոր մարզիչ Ռիչարդ Իմբերնոնը: Նա խոսեց իր թիմի նպատակների եւ մրցակցի մասին: Իմբերնոնը նշեց, որ վիճակահանության արդյունքում իրենց բաժին է հասել հնարավոր ամենաբարդ մրցակիցը:

«Մեր նպատակն է անցնել հաջորդ փուլ: Գրեթե վստահ եմ, որ մեզ բաժին հասավ ամենաբարդ մրցակիցը: Գիտենք դա, որովհետեւ անցած տարի տեսանք, թե որքան դժվար է «Ալաշկերտի» դեմ: Ավելի պատրաստված ենք եկել»,- ասաց նա:

Անցած տարի Իմբերնոնի եւ Հայաստանի չեմպիոն «Ալաշկերտի» գլխավոր մարզիչ Աբրահամ Խաշմանյանի միջեւ հեռակա բանավեճ էր ծավալվել: Խաշմանյանը նախախաղային ասուլիսի ժամանակ ասել էր, որ պատրաստվում են ճզմել մրցակցին: Իմբերնոնն այդ խոսքերից վիրավորվել էր, սակայն հիմա, նրա խոսքով, ամեն ինչ անցյալում է:

«Եթե մեկ տարի անց չկարողանայի մոռանալ, դա ոչ մի լավ բան չէր ասի իմ մասին ոչ որպես մարզիչ, ոչ էլ որպես մարդ (ծիծաղում է)»,- ասաց նա:

«Ալաշկերտ»-«Սանտա Կոլոմա» հանդիպումը տեղի է ունենալու հունիսի 27-ին Վազգեն Սարգսյանի անվան «Հանրապետական» մարզադաշտում: Մեկնարկելու է ժամը 20:00-ին:

Անցած տարի այս 2 թիմերը կրկին միմյանց դեմ էին դուրս եկել Չեմպիոնների լիգայի որակավորման 1-ին փուլում: 2 խաղերի արդյունքում «Ալաշկերտը» հաղթեց 3:0 հաշվով եւ հաջորդ փուլ անցավ: