«Դե ես շատ գիտեմ ոնց են հարստացել». ՊԵԿ նախագահ

Պետական եկամուտների կոմիտեի նախագահ Վարդան Հարությունյանն այսօր խորհրդարանում լրագրողների հետ զրույցում անդրադարձել է ստվերի ու մենաշնորհների դեմ պայքարին, օլիգարխներին հարկման դաշտ բերելու և իր բիզնեսների մասին հարցերին: ՊԵԿ նախագահը լրագրողներին ասաց. “Ինձ նեղում եք”:

 

Ներկայացնում ենք հարցուպատասխանը:

 

Ձեզ հաջողվո՞ւմ է խոշորներին ստվերից բերել հարկման դաշտ, պայքարել օլիգարխնների դեմ, որպեսզի երկրում չլինեն արտոնյալներ:

 

Ես կարող եմ ձեզ հավատացնել, որ մենաշնորհների ու ստվերի դեմ ամեն օր մենք պայքարում ենք: Ունե՞նք արդյունքներ, թե՞ ոչ, ինձ թվում է, որ բյուջեի կատարողականի հինգ ամսվա թվերը փաստում են, որ դրական միտումներ կան:

 

Քեթրին Գրուպում տեղի ունեցած ստուգումնե՞րն էլ եք այդ համատեքստում դիտարկում:

 

Քեթրին Գրուպը տնտեսվարող սուբյեկտ է, որտեղ կարող է առաջանալ ցանկացած խնդիր, ինչպես և բոլոր տնտեսվարողների մոտ: Եթե մենք ունենք  որևէ ռիսկ որևէ ընկերությունում, բնական է, որ պետք է ստուգվեն:

 

Բացի Քեթրին Գրուպից, էլ ո՞ր խոշոր ընկերություններում եք ստուգումներ անում:

 

Եթե դուք ունեք ցանկություն, մենք հետո կտրամադրենք ցանկը:

 

Ալեքս Տեքստիլ ընկերությունում էլ կանե՞ք ստուգումներ:

 

Իհարկե, եթե անհաժեշտություն լինի:

 

Վարչապխետի այցից հետո ԶԼՄ-ները հաշվարկներ էին արել, որ եկամտահարկը չի համապատասխանում այդ ընկերության հրապարակած աշխատակիցների թվաքանակին: Մամուլի այդ հրապարակմանն արձագանքե՞լ եք:

 

Այո, արձագանքել ենք:

 

Դուք ստվեր տեսնո՞ւմ եք այնտեղ:

 

Որևէ երկրում ստվերը 100 տոկոսով վերացված չէ: Ուղղակի մենք ամեն օր պետք է հետևողական պայքար տանենք դրա դեմ: Եթե ձեզ հետաքրքրում է կոնկրետ Ալեքս Տեքստիլը, ապա բոլորն ենք ստուգելու, ոչ միայն այդ ընկերությունը, մի ֆիքսվեք մի սուբյեկտի վրա: Եթե դուք կոնկրետ փաստ ունեք, շնորհակալություն, որ դուք այդ փաստը հրապարակեցիք, ես ձեզ հավաստիացնում եմ, որ արագ կարձագանքենք:

 

Պատիժններ էլ կլինե՞ն:

 

Իհարկե, կլինեն:

 

Եղե՞լ է մի խոշոր տնտեսվարող, որը նախքան ձեր պաշտոնավարելը ստվերում է գործել, հետո դուք նրան բերել եք հարկման դաշտ:

 

Դուք երևի վերջին 8-9 ամսվա իմ աշխատանքային գործունեությունը տեսել եք, երբևիցե ես չեմ փորձել մեր ձեռքբերումները հանրայնացնել և դրանց մասին բարձարաձայնել: Դրա համար թույլ տվեք այդ հարցին չպատասխանել:

 

Ինչո՞ւ եք թաքցնում հանրությունից այդ տեղեկությունը:

 

Այսօր կարող ենք արձանագրել, որ հարկային եկամուտների աճ կա վերջին 8-9 ամսում, և դրանով կարելի է փաստել այն հաջողությունները, որոնք ունեցել ենք:

 

Եթե տեղեկությունը թաքուն եք պահում, մենք էլ կարող ենք ենթադրել, որ փոքր ու միջին բիզնեսի հաշվին եք հիմնականում հարկային եկամուտները հավաքագրել:

 

Պնդեք, դուք ամեն ինչ կարող եք անել:

 

Դա խիստ գաղտնի տեղեկությո՞ւն է:

 

Ոչ, ուղղակի հարկային գաղտնիք կա: Ցանկացած տնտեսվարող իր աշխատանքի ընթացքում կարող է թույլ տալ սխալներ, ստուգման արդյունքում այդ սխալներն ի հայտ են գալիս և շտկվում են, որի արդյունքում պետական բյուջե տուգանքի տեսքով գումարներ են վճարվում: Եթե վճարվել է, մարդիկ շտկվել են, ինչո՞ւ եք դուք հիմա ուզում ցեխ շպրտել այդ մարդկանց վրա:

 

Վարչապետը հայտարարել է, որ պետք է հրապարակային գործեք, հրապարակեքնրանցանունները:

 

Վարչապետի կոչին համահունչ էսօր ձեր հետ զրուցում եմ:

 

Պարոն Հարությունյան, ի՞նչ միջոցներից է գոյացել ձեր ունեցվածքը:

 

Մի մոռացեք, որ ես մինչև 2016 թվականի հոկտեմբեր ամիսն աշխատել եմ բիզնեսում: Եթե անհաջողակ բիզնեսմեն լինեի, ոչինչ չէի ունենա, եթե հաջողակ բիզնեսմենը պետք է չունենա որոշակի կարողություն, իմ համար դա ընդունելի չէ:

 

Երեք առանձնատուն ունեք:

 

Կարող էի և վեցն ունենալ:

 

Հիմա բիզնեսներ չունե՞ք:

 

Ես չունեմ, իմ ընտանիքի անդամներն են զբաղվում:

 

Իսկ չե՞ք հովանավորում նրանց, շահերի բախում չկա՞:

 

Դուք կարող եք բաց ու հրապարակային ինֆորմացիա ունենալ, հովանավորություն իմ կողմից համենայնդեպս չի եղել:

 

Կոռուպցիայի դեմ պայքարի շրջանակներում կարծես համաներում հայտարարվեց արդեն հարստացած պաշտոնյաներին: Դուք ինչպե՞ս եք վերաբերում դրան, պետք է բյուջեից թալանված գումարները հետ բերվեն բյուջե՞, թե՞ ոչ:

 

Միանշանակ, եթե բյուջեից թալանված գումարներ կան, պետք է հետ բերվեն բյուջե: Ասում եք՝ ինչպե՞ս է, որ ՊԵԿ-ում աշխատակիցներ են կալանավորվում, ես միանշանակ կողմ եմ, որ եթե մարդիկ ինչ-որ հանցանք են գործում, դրա համար պետք է պատասխան տան:

 

Ձեր կարծիքով՝ ինչպե՞ս են հարստացել Հայաստանի պաշտոնյաները:

 

Դե ես շատ գիտեմ ինչպես են հարստացել: Եթե դուք ըտենց ինֆորմացիա ունեք, ես ըտենց ինֆորմամցիայի չեմ տիրապետում, ուրիշի կարողությունն էլ չեմ փաստում:

 

Սահմանը բա՞ց է բոլոր ներկրողների առաջ, ով ինչ ցանկանա, կարո՞ղ է ներկրել:

 

Հարյուր տոկոսով: Դուք բերեք մի փաստ, որ ինչ-որ մեկն ուզում է մի բան ներկրել, և հարկային ու մաքսային մարմինները խոչընդոտում են:

 

Երբ հայտարարեցիք՝ ով ինչ ուզում է, կարող է ներկրել, դրանից հետո անցել են ամիսներ: Կարո՞ղ եք ասել ինչ փոփոխության է ենթարկվել մեր ներկրման կառուցվածքը:

 

Ձեզ կտրամադրենք:

 

Օրինակ՝  շաքարավազ քանի՞ ընկերություն է ներկրում:

 

Շատ ընկերություններ, շատ-շատ, քսանից ավելի ընկերություններ:

 

Բանան քանի՞ մարդ է ներկրում:

 

Չեմ կարող ասել, հասկացեք, բանանն էդքան կարևոր չի ինձ համար: Ուղղակի ձեր մոտ կարծրատիպ է, որ շարքարավազը պետք է ներմուծի մի մարդ, բանանը պետք է ներմուծի ուրիշ մարդ:

 

Իսկ եթե մրցակցությունը ապահովված է, ինչո՞ւ գնանկում չկա:

 

Որովհետև հարկերն ավելացել են:

 

Այսինքն՝ ձեր գործողությունները վատ ազդեցությո՞ւն են ունենում բնակչության վրա:

 

Բնական է, որ եթե նախկինում ստվերում էին գործում, բայց այսօր ստվերում չեն գործում որոշ ընկերություններ, գնի վրա դա որոշակի ազդեցություն պետք է ունենար:

 

Ասացինք՝ բանանը կարևոր չէ ձեր համար, բա ի՞նչն է կարևոր:

 

Իմ ընդհանուր գործունեությունը:

 

Կարո՞ղ եք ասել, թե ձեր աշխատանքի արդյունքում որ ապրանքատեսակների շուկան է ազատականացվել:

 

Բոլոր, ես էսօր պատրաստ չէի, որ էդ հարցերը կտաք ինձ, հասնեմ տեղ, զանգեք, ձեր բոլոր հարցերի պատասխանները կտամ:

 

Ինչպե՞ս եք օլիգարխներին ասել, որ այսուհետ ով ինչ ուզի, պետք է ներկրի, նրանց հավաքել, ժողով եք արել, թե՞ այլ կերպ եք իրազեկել:

 

Ի՞նչ նկատի ունեք օլիգարխ ասելով:

 

Օրինակ՝ Սամվել Ալեքսանյանը, Միհրան Պողոսյանը և մյուսները:

 

Նրանք, եթե չեմ սխալվում, այսօր պատգամավորներ են և նման գործունեությամբ զբաղվելու իրավունք չունեն:

 

Հայտարարություներ եղան, որ ձեր կառավարությունն ու վարչապետը հեռացող են: Դուք ինչ զգացողություններ ունեք, հեռացո՞ղ եք:

 

Ես հեռացողի նմա՞ն եմ: Ես այնտեղ եմ, որտեղ կցանկանա իմ թիմը: Եթե նպատակարհարմար չեն գտնի, չեմ լինի, ո՞վ է ասում, որ պաշտոնը հավերժ է, կամ ո՞վ է ասում, որ ես կառչած եմ էդ պաշտոնից: Ընդհանրապես կառչած չեմ:

 

Ովքե՞ր են ձեր թիմը, բացի Կարեն Կարապետյանից:

 

Բոլորը:

 

Սերժ Սարգսյանի թիմի՞ց եք:

 

Այո, ինչո՞ւ ոչ:

 

Թե՞ Կարեն Կարապետյանի թիմից:

 

Դա նույն թիմն է: 

 

«ԼՐԱԳԻՐ»