Որդին մորը մեղադրել է անբարոյականության մեջ, դանակը մխրճել է պարանոցն ու սպանել

Առաջին / Վերաքննիչ քրեական դատարանում ավարտվեց Տիգրան Գ.-ի գործով բերված վերաքննիչ բողոքի քննությունը:

Գործը քննվել է Գեղարքունիքի մարզի ընդհանուր իրավասության դատարանում Յուրի Իսկոյանի նախագահությամբ:

27-ամյա Տիգրանին մեղադրանք էր առաջադրված դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:

Սպանվածը Տիգրանի մայրն էր:

Նախաքննության ընթացքում Տիգրան Գ.-ի նկատմամբ նշանակվել ու կատարվել է դատահոգեբուժական փորձաքննություն, որի եզրակացությամբ՝ փորձաքննվողը տառապում է հոգեկան հիվանդությամբ, իրեն մեղսագրված արարքը կատարել է ցնորազառանցական ապրումների ազդեցության տակ: Տիգրան Գ.-ն ճանաչվել է անմեղսունակ:

Նախաքննության ժամանակ ինքը՝ Տիգրանը հայտնել է, որ 2016 թվականի սեպտեմբերի 7-ին մորաքրոջ որդու մեքենայով գնացել է մորեղբոր տուն, որտեղ որոշել է, որ պիտի սպանի իր մորը՝ Օֆիկին: Նույնիսկ փորձել է մոր պարանոցից պոկել իր կողմից նվիրված մետաղե խաչը:

Հաջորդ օրը՝ սեպտեմբերի 8-ին, ժամը 15-ն անց 30-ի սահմաններում իրենց առանձնատան խոհանոցում վերցրել է սեղանին դրված փայտե կոթով դանակը, մորը մեղադրել է անբարոյականության մեջ ու դանակով մեկ անգամ հարվածել է մոր աջ կողքին, բայց դանակը բութ էր, չի մտել մարմնի մեջ:

Մայրը խոհանոցից վազելով դուրս է փախել, որ օգնություն կանչի: Ինքը դանակը ձեռքին հետապնդել, բռնել է նրան: Մայրը կարողացել է իր ձեռքից խլել դանակը ու նետել անհայտ ուղղությամբ:

Ինքը գրկել է մորը, տեղափոխել է տուն՝ հյուրասենյակ, մեջքի վրա պառկեցրել է հատակին ու պատից կախված դանակը վերցնելով՝ սկզբում մեկ անգամ հարվածել է մոր որովայնի շրջանին, հետո մեկ անգամ հարվածել է նրա աջ կողքի շրջանին: Դրանից հետո էլ մորը շրջել է դեմքով դեպի հատակը, երկու անգամ նույն դանակով հարվածել է նրա թիկունքի ձախ մասին, վերջում էլ դանակը մինչև վերջ մխրճել է մոր պարանոցի մեջ, դանակը մխրճված թողել ու տանից դուրս է եկել:

Փողոցում հանդիպել է հարևանին ու ասել է, որ իր մորը սպանել է: Հարևանից հեռախոս է խնդրել, զանգել է շտապօգնություն, ասել է, որ իր մորը սպանել է: Հետո գնացել է տուն և սպասել է շտապօգնության ու ոստիկանների գալուն:

Տուժողի իրավահաջորդը՝ սպանված կնոջ եղբայրը, հայտնել է, որ դեպքի օրվա առավոտյան քույրը՝ Օֆիկը, զանգել ու խնդրել է, որ մեքենայով գնա նրանց տուն՝ Տիգրանին տանեն հիվանդանոց: Իր կնոջ հետ է գնացել, Տիգրանին տարել են Մարտունու հիվանդանոց, որտեղ քթի վիրահատություն են առաջարկել Տիգրանին: Հետո վերադարձել են քրոջ տուն, հաց են կերել, սուրճ են խմել: Իրենք Օֆիկին ու Տիգրանին թողել է տանը ու գնացել են իրենց տուն:

Ժամը 15-ի սահմաններում կինն իրեն ասել է, թե Տիգրանը զանգել ու ասել է. «Մաման կարող ա մեռնի, էկեք մեր տուն»:

Ինքն ու կինը անմիջապես գնացել են քրոջ տուն, սենյակում տեսել են քրոջը՝ դեմքով հատակին ընկած, դանակը պարանոցի մեջ մխրճված…

Տուժողի իրավահաջորդն ասել է, թե Տիգրանը վերջին երեք տարիներին իրեն տարօրինակ է պահել, մոր նկատմամբ առանձնահատուկ թշնամական վերաբերմունք է դրսևորել, անընդհատ ասել է, թե մայրն իր թշնամին է, թող աչքին չերևա, նրա եփած ճաշերը թույն են, մայրը ուզում է թույնել իրեն: Բայց իրականում մայրը շատ լավ է վերաբերվել Տիգրանին, հոգատար է եղել…

Տուժողի իրավահաջորդի կինը նշել է, որ դեպքի օրն ինքն էլ է եղել ամուսնու հետ, երբ Տիգրանին տարել են Մարտունու հիվանդանոց: Տիգրանին քթի վիրահատություն են առաջարկել: Հետո Տիգրանին ներկայացրել են նաև նյարդաբանին:

Տիգրանի բացակայությամբ Օֆիկը բժշկուհուն պատմել է, որ որդին տարօրինակ վարքագիծ է դրսևորում, խոսում է, թե ինքն ուզում է նրան թունավորել, իր ձեռքի հացը չի ուտում, իր պատրաստած սուրճը չի խմում: Բժշկուհին դեղեր է նշանակել…

Իսկ մի քանի ժամ անց իրեն զանգել է Տիգրանն ու ասել է, թե մայրը «կարող է մեռնել»… Վերջին շրջանում, ըստ վկայի, Տիգրանը մորը հաճախ ծեծել է: Մայրը համբերել է…

Ընդհանուր իրավասության դատարանը անմեղսունակության վիճակում քրեական օրենքով արգելված արարք կատարած անձ Տիգրան Գ.-ին ազատել է քրեական պատասխանատվությունից ու պատժից:

Նրա նկատմամբ կիրառել է բժշկական բնույթի հարկադրանքի միջոց՝ հոգեբուժական հիվանդանոցի հատուկ տիպի հոգեբուժական բաժանմունքում հարկադիր բուժում:

Դատահոգեբուժական փորձաքննության եզրակացության մեջ նշված է, որ Տիգրան Գ.-ն վտանգ է ներկայացնում ինչպես իր, այնպես էլ շրջապատի համար:

Ընդհանուր իրավասության դատարանում գործի քննության ժամանակ անմեղսունակ ամբաստանյալը հոգեբուժարանից չի ներկայացվել դատարան՝ նկատի է առնվել այն հիվանդագին խանգարված վիճակը, որում նա գտնվել է. «Ներկայումս նա նույնպես չի կարող գիտակցել իր գործողությունների վտանգավորությունը և ղեկավարել դրանք… Իր ներկա հոգեկան վիճակով Տիգրան Գ.-ն չի կարող մասնակցել դատաքննչական գործողություններին, սոցվտանգ է ներկայացնում ինչպես իր, այնպես էլ շրջապատի համար…»:

Տիգրան Գ.-ն չներկայացվեց նաև վերաքննիչ դատարան՝ հոգեբուժական կլինիկայում նույն հիվանդագին խանգարված վիճակում գտնվելու պատճառաբանությամբ:

Տիգրան Գ.-ի շահերի պաշտպան, փաստաբան Ա. Խաչիկյանը իր վերաքննիչ բողոքում, նկատի առնելով, որ գործը առաջին ատյանի դատարանում քննվել է անմեղսունակ ամբաստանյալի բացակայությամբ, պահանջել էր անթույլատրելի ապացույց ճանաչել Տիգրան Գ.-ի նախաքննական ցուցմունքները, բեկանել դատական ակտը, գործն ուղարկել համապատասխան ստորադաս դատարան՝ նոր քննություն կատարելու կամ կայացնել գործն ըստ էության լուծող դատական ակտ՝ դիտավորյալ սպանության համար Տիգրան Գ.-ին ճանաչել անմեղ:

Վերաքննիչ քրեական դատարանը ամբողջությամբ մերժեց պաշտպանի վերաքննիչ բողոքը՝ ուժի մեջ անփոփոխ թողնելով ընդհանուր իրավասության դատարանի դատական ակտը՝ Տիգրան Գ.-ին քրեական պատասխանատվությունից ու պատժից ազատելու, նրա նկատմամբ բժշկական բնույթի հարկադրանքի միջոց կիրառելու՝ հոգեբուժական հիվանդանոցի հատուկ տիպի հոգեբուժական բաժանմունքում հարկադիր բուժում նշանակելու մասին: