Երեխային սպանելու մեջ մեղադրվող հայ տղամարդը՝ ամերիկյան դատարանում / լուսանկարներ

ԱՄՆ-ում հնգամյա որդու սպանության համար մեղադրվող Արամազդ Անդրեսյանը, ով Կալիֆորնիա նահանգի հարավային հատվածի բնակիչ է, Նևադայում ներկա է եղել իր գործով առաջին դատական նիստին, որի ժամանակ խիստ տարօրինակ վարք է դրսևորել:

Ինչպես նշում է The Daily Mail-ը, Անդրեսյանը դատարանում ասել է, որ ինքն ամենևին էլ չի փորձել փախչել իշխանություններից՝ չնայած, որ որդու անհետացումից հետո զվարճանալու է մեկնել Լաս Վեգաս, որտեղ անցկացրել է 47 օր:

«Եթե Կալիֆորնիայում ուզում են ինձ ստանալ, ապա կարող են գալ այստեղ ու բռնել ինձ: Ես այստեղ փախչելու մտադրությամբ չեմ եկել»,- դատավոր Էրիկ Գուդմանին ասել է կասկածյալը:

Պարբերականը նկատում է, որ խոսելու ամբողջ ընթացքում տղամարդու դեմքին տարօրինակ ժպիտ է եղել, և նա, առհասարակ, սգացող ծնողի տպավորություն չի թողել:

Առայժմ հայտնի չէ, թե Անդրեսյանը երբ կուղարկվի Կալիֆորնիա. ներկայում նա պահվում է Նևադայի բանտերից մեկում:

Դատական նիստից հետո լրագրողների հետ շփվել է սպանված տղայի մայրը՝ Անա Էստևեզը:

«Աշխարհում չկա այնպիսի արդարություն, որն իմ տղային հետ կբերեր: Բայցևայնպես, նա թանկ է վճարելու իր արածի համար»,- ասել է կինը:

Մեղադրող կողմի կարծիքով՝ 35-ամյա տղամարդը որդու հետ «Դիսնեյլենդ» գնալուց հետո սպանել է նրան ու դին թաքցրել: Թեև տղայի դին ապրիլի 21-ին անհետանալուց հետո դեռևս չի հայտնաբերվել, այնուհանդերձ՝ արդեն կան բավարար չափով ապացույցներ, համաձայն որոնց հենց հայրն է սպանել փոքրիկին:

Ինչպես ավելի վաղ հայտնել էր Tert.am-ը, Արամազդ Անդրեսյանին 5-ամյա որդու սպանության գործով մեղադրանք է առաջադրվել:

Մամուլի ասուլիսի ժամանակ գլխավոր դատախազ Ջեքի Լեյսին հայտարարել է, որ քննիչները բավականաչափ ապացույցներ են հավաքել 35-ամյա Անդրեսյանին որդու՝ Արամազդ Անդրեասյան-կրտսերի սպանության համար կասկածելու համար:

Հայտնի է, որ որդու անհետացումից հետո հայրը մեկնել է Լաս Վեգաս, զվարճացել ու իրեն ամենևին էլ երեխայի համար անհանգստացող ծնողի պես չի պահել: Այնուհետև նա փորձել է փոխել արտաքինը, սափրել է մորուքը, ներկել մազերը՝ քննիչների մոտ տպավորություն ստեղծելով, թե փորձում է լքել երկիրը:

Եթե նրա մեղքն ապացուցվի՝ տղամարդուն կարող է մինչև 25 տարվա ազատազրկում սպառնալ:

Լոս Անջելեսի շերիֆ Ջո Մենդոզայի խոսքով՝ Անդրեսյանի պահվածքի համար կարող էր պատճառ լինել որդու մոր հետ ցավագին ամուսնալուծությունը:

Այժմ իրավապահները 30.000 դոլար են խոստացել յուրաքանչյուրին, ով որևէ տեղեկություն կհայտնի երեխայի դիակի գտնվելու վայրի վերաբերյալ: