Ձեռքերը ծալած նստելն ու երկնքին նայելը ամենահեշտ զբաղմունքն է. Արթուր Անանյան

NewsArm.am-ի հարցազրույցը գործարար, Նոյեմբերյան համայնքի ավագանու անդամ, Տավուշի մարզի ԵԿՄ վարչության փոխնախագահ Արթուր Անանյանի հետ, ով Նոյեմբերյան համայնքի ղեկավարի թեկնածու է: 

Պարոն Անանյան, Նոյեմբերյան համայնքում կարծես բավականին թեժ պայքար է ընթանում համայնքի ղեկավարի պաշտոնի համար, ինչն է պատճառը:

Գլխավոր պատճառը համայնքների միավորումն է, ինրը բազմաթիվ խաղաքարեր խառնեց, պայքարը ավելի թեժ և հետաքրքիր դարձրեց, որովհետև այս ֆորմատով առաջին ընտրությունն է: Երկրորդ պատճառը, իհարկե, կուտակված խնդիրների քանակն ու բազմազանությունն է, մարդիկ փոփոխություններ են ուզում:

Այդ փոփոխությունները հնարավո՞ր է առկա միջոցների և բյուջեային մուտքերի պայմաններում:

Արդյունավետ կառավարում գոնե հնարավոր է, ներդրողների հետ բանակցել և տնտեսությունը աշխուժացնել գոնե հնարավոր է, սահմանագոտին հարկերից ազատելու կառավարության որոշումից օգտվել և բազմաթիվ բիզնես նախագծեր ներգրավել գոնե հնարավոր է: Ձեռքերը ծալած նստելն ու երկնքին նայելը ամենահեշտ զբաղմունքն է:

Պատերազմ, ԵԿՄ կառույցներ և... համայնքապետ: Մի քիչ բարդ ուղի չէ՞...

Թշնամին թշնամի է... Մարտադաշտում դու հակառակորդին ես ոչնչացնում, այս մյուս ՛՛ֆրոնտում՛՛՝ անարդարությունն ու սոցիալական խնդիրները: Քամի ծածանելու ժամանակներն անցել են, յուրաքանչյուր աշխատանք յուրօրինակ մարտադաշտ է... Կարևորը՝ չճկվելն ու չփախչելն է...

Ինչպես եք պատկերացնում ընտրության հաջորդ օրվա՝ սեպտեմբերի 19-ի Նոյեմբերյան համայնքը:

Ինչպես միշտ՝ բոլորս բահը ձեռքներիս այգին խնամելիս կամ սահմանագոտին ամրացնելիս, մեր առաջ դրված խնդիրները համատեղ ուժերով լուծելիս... Ով համայնքի զարգացման համար անգամ փոքրիկ աշխատանք կատարելու պատրաստ է՝ մեր դաշնակիցն է ու մեր աչքի լույսը...

Դժվարին, բայց պատվաբեր գործ ենք սկսելու: