Պաղպաղա՞կ եք սիրում․ կարդացեք

Armtimes.com / Շատերը տրտնջում են, որ շոգ է, չեն կարողանում ուտել, սնվում են օրվա մեջ մեկ անգամ, ինչը սխալ է: Օրվա մեջ պետք է անպայման ընդունել անհրաժեշտ վիտամիններով սնունդը եւ խմել հնարավորինս շատ ջուր: armtimes.com-ի հետ զրույցում դիետոլոգ Լիլիթ Բաբասյանը խորհուրդ տվեց բացառել գազավորված ըմպելիքն եւ այլ տեսակի հյութերը, կարելի է ուղղակի խմել սովորական թեյ, խորհուրդ է տրվում հատկապես կանաչ թեյը:

«Ամռան այս շոգ օրերին հաճախ եմ հանդիպում, որ երեկոները մարդիկ խմում են ֆրեշ, որով եւ փոխարինում են սնունդը՝ մտածելով, որ այսկերպ չեն գիրանա: Սակայն պետք է հիասթափեցնեմ նրանց, քանի որ ֆրեշը պարունակում է շաքարավազ, եւ այն խթանում է գլուկոզայի բարձրացմանը: Այնպես որ ֆրեշը նույնպես պետք է խմել օրվա առաջին կեսին: Իսկ ինչ վերաբերում է ֆրեշն առաքելուն, կասեմ, որ սա սխալ է: Այն պետք է խմել պատրաստելուց հետո ամենաշատը մեկ ժամվա ընթացքում, քանի որ հետո կորցնում է իր օգտակար հատկությունները: Պետք չէ նաեւ սառը սուրճ խմել, քանի որ այն եւս վնասակար է: Խորհուրդ է տրվում դառը սովորական սեւ սուրճը»,- ասաց նա եւ հավելեց, որ քնելուց 3 ժամ առաջ պետք է ոչինչ չուտել:

Դիետոլոգ Լիլիթ Բաբասյանը մեր ընթերցողին խորհուրդ տվեց օրվա առաջին կեսին մրգեր ուտել, սակայն պետք չէ մրգերի տեսակները խառնել իրար, այլ ամեն օր մրգի որեւէ տեսակ փորձել:

«Շատերն առավոտից երեկո ձմերուկ են ուտում՝ հուսալով, որ այն չի գիրացնում, սակայն պետք է հիասթափեցնեմ՝ այս մրգի մեջ գլուկոզան եւս շատ է եւ այն նույնպես պետք է ուտել օրվա առաջին կեսին: Նախաճաշին խորհուրդ եմ տալիս ուտել ածխաջրածնով հարուստ ուտեստ: Կարող եք ուտել հնդկաձավարով ինչ-որ ուտեստ, շիլա եւ այլն: Կարելի է ուտել նաեւ օմլետ եւ մրգեր: Օրվա երկրորդ կեսին սպիտակուցներով հագեցած սնունդ պետք է ուտել եւ բանջարեղեն: Օրգանիզմում սպիտակուցի քանակը պահպանելու համար պետք է ուտել միս, ցանկալի է խաշած վիճակում, կամ եթե` ոչ, ապա նրան փոխարինող որեւէ բան, օրինակ՝ լոբի, որը հագեցած է սպիտակուցով»,- նշեց Բաբասյանը:

Այս շոգերին խորհուրդ չի տրվում շատ օգտագործել կաթնամթերք: Հատկապես, եթե օրվա ընթացքում երկար ժամանակ եք գտնվելու արեւի տակ, ապա մի՛ կերեք կաթնամթերք: Պաղպաղակը պետք է ուտել շաբաթը մեկ անգամ:

Դիետոլոգը վերջում հավելեց, որ պետք է անպայման օրվա մեջ ճիշտ սնունդ ընդունել, հակառակ դեպքում կվնասեք ձեր առողջությունը: