Շատ վատ է մարդուն շանտաժ անելը

«Հրապարակ»-ը գրում է․

Ընդունված պրակտիկա է՝ ընտրությունների ժամանակ այս կամ այն պաշտոնում առաջադրված թեկնածուի համար ահռելի, հաճախ նաեւ սեւագործ աշխատանք է կատարում նրա նախընտրական թիմը. թեկնածուի օգտին քարոզչություն անել, ձայներ հավաքագրել, ընդհուպ՝ կաշառք բաժանել, ընտրություններ կեղծել եւ այլ հակաօրինական գործողություններ: Արթիկից, որտեղ նույնպես հոկտեմբերի 2-ին ՏԻՄ ընտրություններ են սպասվում, հերթական ահազանգն ստացանք այն մասին, թե քաղաքապետի թեկնածու առաջադրված ԱԺ պատգամավոր Մուշեղ Պետոյանի օգտին քարզչություն է անում Արթիկի թիվ 2 հիմնական դպրոցի տնօրենը, որը նրա ազգականն է:

Պարզվեց, որ հիշյալ դպրոցի տնօրենը Պետոյանի հորեղբոր դուստրն է՝ Սուսաննա Պետոյանը։ Նա մեզ հետ զրույցում կտրականապես հերքեց այն լուրերը, թե «տիկինը որտեղ նստում-կանգնում՝ Պետոյանի քարոզն է անում՝ դպրոց լինի, թե ընտանիք, հարսանքատուն, թե մեռլատուն»: Ավելին՝ մեր հարցումները տնօրենը որակեց որպես «շանտաժ»: «Աղջիկ ջան, նման բան չի եղել եւ չի էլ լինելու, ես Ձեզ վստահեցնում եմ: Եթե Դուք իմ տարիքը հարգում եք եւ եթե ինձ ճանաչեիք, այդ ժամանակ նման բան չէիք ասի: Զարմանալի է, թե ով է Ձեզ նման տեղեկություն հասցրել, ասեք կոնկրետ անուններ, եթե չեք ասում, ապա Դուք ինձ շանտաժ եք անում: Ես առայժմ որեւէ մեկի կողմից, որեւէ նման հարց չի քննարկվել: Չի եղել նման բան: Նախ՝ ես իրավունք չունեմ քարոզչությամբ զբաղվել՝ սա մեկ: Ես իմ բոլոր պարտականությունները շատ լավ գիտեմ: Նման բան չի եղել: Եվ եթե Դուք որեւէ մեկին բերեք, որ կկանգնի ու կասի, որ ես երբեւէ նման բան ասել եմ, ես… խոսքով»,-վստահեցրեց դպրոցի տնօրենը՝ եւս մեկ անգամ կրկնելով արդեն քանիցս կրկնած խոսքը. «Նման բան չի եղել»: «Այնուամենայնիվ, քանի որ դպրոցի տնօրեն եք եւ աշխատանքի բերումով շատ եք շփվում տեղացիների հետ, ընտրողներն ի՞նչ տրամադրվածություն ունեն Պետոյանի հանդեպ՝ որպես քաղաքապետի թեկնածուի, նա ընտրվելու ռեալ շանսեր ունի՞»,- հարցրիք տիկին Պետոյանին:

«Աղջիկ ջան, ես այդ հարցին պատասխանել չեմ կարող, ոչ մեկի համար ռեալ շանսեր գոյություն չունեն: Ընտրության ընթացքը եւ ժողովրդի քվեարկությունը դա ցույց կտան, ես որտեղի՞ց կարողանամ ռեալ շանսերի մասին խոսել: …Ես իրավունք չունեմ այս մասին որեւէ բան ասել, շատ հնարավոր է, որ ընտրության ընթացքը բոլորովին այլ ուղղությամբ գնա, ես ինչպե՞ս կարող եմ կանխատեսել, թե ով ոնց կգնա քվեարկելու»,-կտրուկ արձագանքեց տիկին տնօրենը: Նկատենք, որ արթիկցիները մեկ այլ ահազանգ էլ էին հնչեցրել, որն առնչվում է Պետոյանի ընտանիքի մեկ այլ անդամի՝ Թուրինջ Պետոյանին՝ Մուշեղ Պետոյանի հորը, որն Արթիկ համայնքի ավագանու անդամ է: Ըստ լուրերի՝ Թ. Պետոյանը մի քանի շաբաթ առաջ սկսել է նշված դպրոցի հարեւանությամբ գտնվող իր առանձնատան պարսպապատումը եւ խլել է դպրոցին պատկանող տարածք, ինչպես նաեւ սելավատարի տարածքի մի հատվածը՝ դժվարանցանելի դարձնելով տեղանքում մարդկանց երթեւեկը: Ինչպես հայտնի է՝ հունիսին Արթիկում արձանագրված հուժկու սելավը մեծ ավերածություններ գործեց քաղաքում, ինչի հետեւանքով վնաս էին կրել նաեւ Պետոյաններին պատկանող տունը եւ թիվ 2 դպրոցը: Եվ ներկայումս, ըստ արթիկցիների, Պետոյանը պարիսպ է կառուցում, որպեսզի իր ամրոցն ապահովագրի հետագայում սպասվող աղետներից: Տիկին Պետոյանը մեզ հետ զրույցում այս թեման նույնպես հերքեց՝ պնդելով, որ պարիսպն ամենեւին էլ չի ներառում դպրոցի տարածքը:

«Եթե Դուք ճիշտն եք ուզում իմանալ, ապա եկեք, եւ ես Ձեզ ցույց կտամ մեր դպրոցի գծագիրը: Դուք կարող եք չափումներով պարզաբանել՝ Թուրինջ Պետոյանը պարիսպը կառուցել է դպրոցի՞, թե՞ իրեն իրավունք վերապահված տարածքում, ինչքան որ ինքը սեփականաշնորհման գրքույկում տարածք ունի: Եկեք, ես ոչ մի վայրկյան չեմ հապաղի, դպրոցի փաստաթղթերը ես ամբողջությամբ Ձեզ կտրամադրեմ, ում ուզում եք՝ կբերեք, առանց բացառության: Գիտե՞ք, շատ վատ է մարդուն շանտաժ անելը, զրպարտելը: Դպրոցին պատկանող տարածքի նույնիսկ մի սանտիմետրը չի մտել Թուրինջ Պետոյանի հողատարածքի մեջ»:

Մենք զրուցեցինք նաեւ Արթիկի գլխավոր ճարտարապետ Աղասի Խաչատրյանի հետ, որն ասաց, թե իրենք եղել են կառուցվող պարսպի տարածքում եւ ուսումանասիրել այն: «Պարսպի մի մասը ներառել է ոչ թե դպրոցի, այլ համայնքին պատկանող տարածքը, եւ այդ պատճառով դրա շինարարությունը, քանի որ ապօրինի է, մոտ մեկ շաբաթ առաջ մենք դադարեցրել ենք: Քանի որ այդ տարածքը համայնքապատկան տարածք է, եւ այժմ այն կառուցապատվել է, իրավիճակ է փոխվել: Այսինքն՝ նախկինում, քանի որ այդ տարածքում որեւէ կառույց չկար, ցանկացած մեկը, սովորության համաձայն, այդ տարածքով շրջադարձ էր կատարում: Այժմ քաղաքացիների համար մի քիչ անսովոր իրավիճակ է առաջացել, երեւի թե դրա համար են մարդիկ իրենց բողոքը հայտնում»: Պրն. Խաչատրյանը նշեց, թե պարիսպը պաշտպանողական նպատակով է կառուցվել, իսկ դրա ճակատագիրը համայնքի ղեկավարությունը պետք է որոշի:

«Ըստ օրենքի, եթե տվյալ շինության շինարարությունը դադարեցված է, ուրեմն դա կամ ենթակա է քանդման, կամ օրինականացման: Ինքնակամ շինարարությունների քննարկումը զուտ համայնքի գործառույթների մեջ է մտնում, դա որոշում է համայնքի ղեկավարը: Ավագանու միջոցով չէ դա կատարվում, բայց, այնուամենայնիվ, հարցը կարող է նաեւ ավագանու հետ քննարկվել»,-ասաց Արթիկի գլխավոր ճարտարապետը: