«Ընդունեցին, որ մեզ քցել են»

«Նորաշեն 2007» ընկերությունից տուժած մի քանի բնակիչների ԱԺ փոխնախագահ Հերմինե Նաղդալյանի ամուսինը՝ Դավիթ Բեգլարյանը սկսել է գումարներ վճարել, այս մասին MAMUL.am-ի թղթակցի հետ զրույցում տեղեկացրել է տուժած բնակիչներից Անահիտ Հայրապետյանը: «Կառավարության շենքի դիմաց` ակցիայի ժամանակ մեր ձեռքում պահած Հերմինե Նաղդալյանի նկարով պաստառից երևի էդ մարդիկ ամաչեցին ու մեզ սկսեցին վճարել»,- ասաց նա:
Նշենք, որ Գևորգ Չաուշի 14/3 շենքում չնչին գումարներով ուրիշներին պատկանող 14 բնակարաններ է ձեռք բերել ԱԺ փոխնախագահ Հերմինե Նաղդալյանի ամուսինը:
«Կարևորը` ընդունեցին, որ մեզ խաբել են, քցել: Վատն այն է, որ միայն իրենք են գումար տալիս, մյուս վաշխառուներից տուժածները դեռևս գումար չեն ստացել: Իրենք դեռ իրենց պայքարը կշարունակեն»,-ասաց Հայրապետյանը:
Հիշեցնենք նաև, որ Երևանի Գևորգ Չաուշի փողոցում բազմաբնակարան շենք կառուցելու նպատակով «Նորաշեն 2007»-ի ներկայացուցիչները տարիներ առաջ գումարներ էին հավաքել շենքում բնակարան գնելու ցանկություն ունեցող անձանցից: Այնուհետ ընկերությունը հայտարարել էր ֆինանսական խնդիրների մասին, և շինարարությունն անավարտ էր մնացել: Կառուցապատող ընկերության ղեկավարներն, առանց բնակիչներին տեղյակ պահելու, նրանց կիսակառույց բնակարանները գրավ էին դրել ու տոկոսով գումարներ վերցրել տարբեր անձանցից՝ շինաշխատանքներն ավարտին հասցնելու համար: