Թրամփը նոր սկանդալի կիզակետում է հայտնվել

ԱՄՆ նախագահ Դոնալդ Թրամփը հայտնվել է նոր սկանդալի մեջ: Այս անգամ նա մեղադրվում է այն բանի համար, որ Համբուրգում` Քսանյակի գագաթնաժողովի օրերին, երկրորդ հանդիպումն է ունեցել Վլադիմիր Պոյտինի հետ, ընդ որում` առանց թարգմանչի, ինչն ազգային անվտանգության արարողակարգի խախտում է: Ուշագրավ է, որ Թրամփն ու նրա շրջապատը երկրորդ հանդիպման փաստը խնամքով քողարկել են` դրա մասին հրապարակայնացնելով միայն ԶԼՄ-ների արտահոսքից հետո: Թրամփը, ըստ էության, չի հերքում տեղի ունեցածը, սակայն համառորեն պնդում է, որ դա ոչ թե հանդիպում է եղել, այլ մասնավոր զրույց` Քսանյակի առաջնորդների պատվին Անգելա Մերկելի կազմակերպած ճաշի ժամանակ:

Այլ իրավիճակում ամերիկյան վերնախավին ու հասարակությանը գուցե բավարարեին նախագահի բացատրությունները և թեման համարվեր փակված, սակայն Թրամփի խոսքը կորցրել է իր արժեքը, որովհետև ԱՄՆ-ում նոր թափ են ստանում խոսակցությունները, որ նա Սպիտակ տանն է հայտնվել ռուսների օժանդակությամբ:

Կրքերի շիկացմանը նպաստում են այն հանգամանքները, որ Թրամփը Պուտինի հետ երկրորդ անգամ հանդիպել է կամ պարզապես զրուցել է առանց «վկաների» (միայն Պուտինի թարգմանչի ներկայությամբ), և տևական ժամանակ այդ փաստը գաղտնի է պահվել հասարակությունից:

Թրամփն աստիճանաբար մոտենում այն սահմանին, երբ նրան աջակցելն անդառնալիորեն անդրադառնում է Հանրապետական կուսակցության հեղինակության և վարկանիշի վրա: Թրամփին սպառնում է քաղաքական մեկուսացում անգամ հարազատ կուսակցությունում, որից իմպիչմենտ մեկ քայլ է: