Արթուրիկը դառնում է տեռորիստ

Shame.am-ը գրում է․

«Հայկական վերածնունդ» կուսակցության ղեկավար Արթուր Բաղդասարյանին այս օրերին նախանձել հնարավոր չէ, որովհետև նրա բոլոր քայլերը, բոլոր նախապատրաստական աշխատանքները մեկը մյուսի ետևից տապալվեցին ու ընտրությունների շեմին նախկին ՕԵԿ-ը մնացել է մեն-մենակ ու անմխիթար վիճակում: Որքան էլ Բաղդասարյանն իր համակիրներին ոգևորելու համար շարունակում է կրկնել, թե իրենց շուրջ միավորվել են 10-ից ավելի կուսակցություն, 170-ից ավելի հասարակական կազմակերպություն, այս դատարկ, անիմաստ թվերն այլևս տպավորություն չեն գործում: Ու հենց դա է պատճառներից մեկը, որ Արթուրիկն ի վերջո պատրաստվում է հոգեհարազատների նոր միջավայր մտնել և իբրև այդպիսին նա արդեն առանձնացրել է «Սասանա ծռեր» ահաբեկչական խումբը:

Օրերս Հ3 հեռուստաընկերության «Իրական հայացք» հաղորդման ժամանակ Բաղդասարյանն ի վերջո որոշեց բացակայտել իր նոր համակրանքների ոլորտը և մի ընդարձակ հարցազրույց նվիրեց «Սասնա ծռերի» գովքին: Ի դեպ, նկատենք նաև, որ Բաղդասարյանի խոսքերի որոշ հատվածներ գրեթե նույնությամբ կրկնում էին նախկին նախագահ Ռոբերտ Քոչարյանի վերջին հարցազրույցի դրույթները, ինչը մեկ անգամ ևս վկայում է այն մասին, որ ծանր պահերին երբեմնի ոխերիմ թշնամիները կարող են նույնականացման եզրեր գտնել:

Ի՞նչ էր ասում Արթուրիկը հուլիսյան դեպքերի մասին: «Դրանց հիմնական պատճառը մեր երկրում տիրող բարոյահոգեբանական մթնոլորտն է, լրջագույն սոցիալ տնտեսական հիմնախնդիրները, Հայաստանում տիրող իրավիճակն ընդհանրապես… Մենք ունենք հուսահատված ժողովուրդ, իր երկրում ապագա չտեսնող հասարակություն և, իհարկե, ինքս՝ չլինելով իշխանության հետ զինված հարձակման միջոցով հարցեր լուծելու կողմնակից, միևնույն ժամանակ հարց եմ տալիս ինքս ինձ, թե այդ ինչպես եղավ, որ հայրենիքի համար արյուն թափած մարդիկ, ովքեր կռվեցին Ղարաբաղյան պատերազմում, մարդիկ, ովքեր ունեին արի զինվորի, հայրենիքի համար պայքարողի բարի անուն ու լավ համբավ, դիմեցին նման ծայրահեղ քայլերի: Ո՞րն էր պատճառը»:

Ահա այսպես, ինքն իրեն հարց է տալիս Արթուր Բաղդասարյանը և անմիջապես էլ պատասխանում է հետևյալ թևավոր խոսքով. «Խոսքերը ոչինչ չարժեն, իսկ գործողություները ավելին արժեն` քան սոսկ բառերը»: Այլ կերպ ասած՝ նա բացահայտ մարտահրավեր է նետում՝ խրախուսելով արդեն կատարված գործողությունը և հորդորելով դա կրկնել, քանի որ միակ արժեքավոր բանը գործողությունն է՝ անկախ իր ձևերից ու մեթոդներից:

Եթե հետևելու լինենք ՕԵԿ-ի պարագլխի մտքի ընթացքին, ապա երկրում իրավիճակի փոփոխության ամենանախընտրելի տարբերակը նա համարում է այն, ինչն արդեն փորձեցին անել «Սասնա ծռերի» անդամները, այլսինքն` Բաղդասարյանը կողմնակից է Հայաստանում ռազմական հեղաշրջման, զինված ապստամբության կիրառմանը: Պարզ է, որ ինքն անձամբ դա չի կազմակերպի ու չի իրականացնի, քանզի նապաստակ է, Արթուրիկը չափից ավելի վախկոտ ու մորթապաշտ է նման ծայրահեղ քայլի գնալու համար: Սակայն սադրանքներ կյանքի կոչելու հարցում նա շատ մեծ վարպետ է ու ընդունակ է հրահրել ցանկացած անկայունությունը՝ ընդհուպ մինչև զենքի գործադրում: Եվ այս իմաստով Բաղդասարյանը ոչ այնքան «Սասնա ծռերի» կամ «Հիմնադիր խորհրդարանի» գործընկերն ու համակիրն է, որքան այդ մարդկանց ու նրանց նմաններին իր նպատակների համար օգտագործելու թաքուն երազողը, ով շատ բան կտար, միայն թե կրկին Երևանում կրակոցներ հնչեին: