Ադրբեջանը դարձյալ պատերազմի նախապատրաստություն է տեսնում

Առաջին / Ադրբեջանին սահմանակից Տավուշի մարզի Չինարի գյուղը հերթական վտանգավոր հարվածն է ստացել սահմանի մյուս կողմից։ Գյուղում անգամ ստիպված են եղել մանկապարտեզի երեխաներին մեկ ժամով ապաստարան տանել։

Սրան զուգահեռ՝ երեկ համատեղ հայտարարություն են տարածել Ադրբեջանի արտաքին գործերի և պաշտպանության նախարարությունները՝ պնդելով, թե իբր երեկ, ողջ օրվա ընթացքում, Հայաստանի զինված ուժերի ստորաբաժանումները գնդակոծել են ադրբեջանական մարտական դիրքերը, ինչպես նաև խաղաղ բնակավայրերը։

Երեկ երեկոյան ՀՀ ՊՆ-ն կտրականապես հերքել է Բաքվի մեղադրանքները: «Հայաստանի Հանրապետության պաշտպանության նախարարությունը Ադրբեջանի ռազմաքաղաքական ղեկավարությանը նախազգուշացնում է, որ որևիցե սադրանքի պարագայում հայկական կողմը դիմելու է պատասխան կոշտ գործողությունների, և կոչ է անում զերծ մնալ նոր արկածախնդրություններից, որոնք կարող են անկանխատեսելի հետևանքներ ունենալ ողջ տարածաշրջանի համար»,- ասված է Հայաստանի ռազմական գերատեսչության տարածած հայտարարության մեջ:

Ադրբեջանն ըստ էության դիմում է իր համար սովորական դարձած գործելաոճին՝ փորձելով ռազմական սադրանքների միջոցով ստատուս քվո փոխել սեպտեմբերին կայանալիք Նալբանդյան-Մամեդյարով հանդիպման շեմին, որն ըստ էության նվիրված է լինելու Հայաստանի և Ադրբեջանի նախագահների բանակցությունների նախապատրաստմանը մինչև տարեվերջ:

Հազիվ թե բանը հասնի ռազմական լայնածավալ գործողությունների սանձազերծմանը, սակայն Բաքուն միջազգային հանրությանը հերթական մեսիջն է հասցեագրում, որ կդիմի պատերազմական գործողությունների, եթե բանակցություններն իր համար ցանկալի արդյունք չտան:

Մյուս կողմից՝ Բաքուն նոր էսկալացիայի քարոզչական ֆոնը ձևավորում է միջազգային հարաբերությունների հերթական ճգնաժամի ֆոնին, երբ նոր թափով սրվել են ռուս-ամերիկյան հարաբերությունները՝ ԱՄՆ Ներկայացուցիչների պալատի կողմից Ռուսաստանի դեմ պատժամիջոցների նոր փաթեթի ընդունումից հետո: Դրա հետևանքով իրավիճակի նոր սրացում է նկատվում նաև Ուկրաինայի արևելքում։

Այս պահին Ադրբեջանը չունի պատերազմ սանձազերծելու արտաքին ազդակ, աջակցություն, մյուս կողմից՝ գիտակցում է, որ միջնորդները չեն կարող կոնսենսուս ձևավորել հրադադարի պահպանման միջազգային մեխանիզմների շուրջ:

Նման իրավիճակում մեծանում է ստատուս քվոն փոխելու Ադրբեջանի գայթակղությունը և պատերազմական գործողությունների վերսկսման հավանականությունը: