«Ինչ ուզում ես՝ կանեմ». բանվորը հարձակվել է հարևանի կնոջ վրա, ծեծելով քարշ տվել այգի

Լոռու մարզի ընդհանուր իրավասության դատարանում Սուրեն Բաղդասարյանի նախագահությամբ ընթանում է Հայկազ Ծ.-ի գործի դատական քննությունը։

Հայկազը մեղադրվում է համաքաղաքացուհի Գեղեցիկ Վ.-ի (անունը փոխված է) նկատմամբ բռնաբարության փորձ կատարելու համար՝ ՀՀ քրեական օրենսգրքի 34-138 հոդվածի 1-ին մասով։

Ըստ մեղադրանքի՝ Հայկազ Ծ.-ն 2016 թվականի հունիսի 25-ին, ժամը 22-ի սահմաններում Գեղեցիկ Վ.-ի հետ սեռական հարաբերություն ունենալու նպատակով գնացել է վերջինիս պատկանող տան բակ, որտեղ Գեղեցիկի հետ «կենակցելու ձգտումն իրականացնելու նպատակով» փայտով հարվածել է նրա ծոծրակային հատվածին, տեղափոխել է այգի, որտեղ նորից փայտով հարվածել է Գեղեցիկի ուսահոդի շրջանին և օգտվելով նրա անօգնական վիճակից, նրա կամքին հակառակ՝ փորձել է սեռական հարաբերություն ունենալ հետը։

Ըստ մեղադրանքի՝ տուժող Գեղեցիկը Հայկազի կողմից իր հետ սեռական հարաբերություն ունենալու «համառ ձգտումն» ընկալել է որպես իր առողջությանը սպառնացող իրական վտանգ և դիմել է խորամանկության։ Նա չի առարկել, չի դիմադրել, միայն համոզել է Հայկազին, որ նրա կամքը կկատարի, «կամովին նրան կտրվի»՝ միասին սուրճ խմելուց հետո։

Հայկազը համաձայնել է, գնացել է Գեղեցիկի տուն, այդ ընթացքում Գեղեցիկը դիմել է փախուստի, գնացել է հարևանի տուն, օգնություն է խնդրել։

Ըստ մեղադրանքի՝ Հայկազ Ծ.-ն իր հանցավոր մտադրությունը ավարտին չի հասցրել իր կամքից անկախ հանգամանքով պայմանավորված՝ միջամտել է հարևանը։

Տուժող Գեղեցիկը գործի քնության ընթացքում հայտնել է, որ Հայկազին ճանաչել է որպես իր տան հարևանությամբ շինարարություն անող բանվորի։ Նրա հետ առանձնապես չի շփվել, մի քանի անգամ Հայկազն իրենից «ավել ու սավոկ է ուզել»։ Ինքը հասկացել է, որ նա փորձում է սիրահետել, իրեն հեռու է պահել ու առիթ չի տվել։

Երբ շինարարությունն ավարտվել է, Հայկազը հեռացել է, ինքը նրան այլևս չի տեսել։

Դեպքի օրը՝ 2016 թվականի հունիսի 25-ին, ժամը 22-ի սահմաններում ինքը տանը մենակ է եղել։ Ցանկացել է աղբյուրից ջուր բերել, դուրս է եկել տանից ու ծոծրակի շրջանում ուժեղ ցավ է զգացել։ Գիտակցությունը կորցրել է։ Որոշ ժամանակ անց ուշքի է եկել ու տեսել, որ մի տղա իրեն մեջքի վրա գետնին քարշ տալով՝ տանում է այգի։ Նրան ճանաչել ու հարցրել է. «Հայկա՛զ, դո՞ւ ես»։ Նա էլ պատասխանել է. «Լավ էլ ճանաչեցիր»։

Ինքը փորձել է վեր կենալ ու փախչել։ Բայց Հակազը ձեռքի փայտով մի քանի անգամ հարվածել է իր մարմնի տարբեր մասերին։ Ինքը նրան խնդրել-համոզել է, որ իրեն չվնասի, ասել է. «Ինչ ուզում ես՝ կանեմ, ինչ ուզում ես՝ կտամ»։ Հետո նրան առաջարկել է, որ նա գնա իր տուն, սուրճ եփի, մինչև ինքը մի քիչ ուշքի գա, հանգստանա, իրեն կարգի բերի ու գնա նրա մոտ։

Հայկազը հավատացել ու գնացել է։ Ինքը ոտքի է կանգնել ու փախել է հարևանի տուն, օգնություն է խնդրել։ Հարևանի միջամտությունից հետո Հայկազը հեռացել է…

Ամբաստանյալ Հայկազ Ծ.-ն ժխտել է իր կողմից տուժողի նկատմամբ բռնաբարության փորձ կատարելը։ Նա ընդունել է, որ փայտով հարվածներ է հասցրել Գեղեցիկին, բայց ասել է, թե նրան հարվածել է իր ծնողների հասցեի վիրավորական խոսքեր ասելու համար։

Դատաքննության ընթացքում Հայկազ Ծ.-ն «ժամանակ առ ժամանակ» դրսևորել է ագրեսիվ վարքագիծ։

Դատաքննության ավարտական փուլում մեղադրող Ա. Շիրոյանը միջնորդել է ամբաստանյալի նկատմամբ նշանակել դատահոգեբուժական ամբուլատոր փորձաքննություն՝ պատճառաբանելով, որ նրա մոտ առկա է «Անձի շեշտվածություն, հակասոցիալական վարք»։ Մեղադրողը հիշատակել է նաև ամբաստանյալի տարօրինակ վարքագիծը՝ այս գործի դատաքննության ընթացքում։

Պաշտպաններն ու ամբաստանյալը միջնորդության դեմ չեն առարկել։ Պաշտպանը հայտնել է, որ Հայկազ Ծ.-ն նախկինում հոգեկան առողջության հետ կապված՝ անցել է բժշկական հետազոտություններ, վերը հիշատակված հիվանդության հիմքով ազատվել է զինվորական ծառայությունից։

Դատարանն արձանագրել է, որ մինչև զինվորական ծառայությունից ազատվելը՝ զինծառայության ընթացքում Հայկազ Ծ.-ն դիտավորությամբ սակրավորի բահով ծառայակցի գլխին հարվածել ու նրա առողջությանը ծանր վնաս էր պատճառել։ Դրա համար նա դատապարտվել և ազատազրկման ձևով պատիժ է կրել…

Դատարանը եզրակացրել է, որ ամբաստանյալի մոտ ախտորոշված հիվանդությունը, մեղսագրված արարքի՝ բռնաբարության փորձի կատարման եղանակը, դատական քննության ընթացքում ամբաստանյալի դրսևորած ագրեսիվ վարքագիծը իրենց համակցության մեջ ողջամիտ կասկած են առաջացնում ամբաստանյալի հոգեկան առողջության վերաբերյալ։ Այդ հարցը պարզաբանելու համար անհրաժեշտ են հոգեբուժության բնագավառի գիտելիքներ։

Գործի նախաքննության ժամանակ Հայկազ Ծ.-ի նկատմամբ դատահոգեբուժական փորձաքննություն չի նշանակվել։

Դատարանը բավարարել է մեղադրողի միջնորդությունը և Հայկազ Ծ.-ի նկատմամբ նշանակել է դատահոգեբուժական ամբուլատոր փորձաքննություն։ Փորձագետներին առաջադրված հարցերից են, մասնավորապես, մեղսունա՞կ է Հայկազ Ծ.-ն, նա կարիք ունի՞ հարկադիր բուժման։

Գործի դատական քննությունը կվերսկսվի դատահոգեբուժական ամբուլատոր փորձաքննության եզրակացությունը ստացվելուց հետո։