Ֆեյսբուքը սկանդալի կենտրոնում է հայտնվել՝ պատմական նկարները բնորոշելով որպես պոռնոգրաֆիա․ ֆոտոներ

Facebook-ը հայտնվել է սկանդալի կենտրոնում, երբ ջնջել է վիետնամցի աղջկա մերկ լուսանկարները, որն այրվածքներ էր ստացել իր գյուղի վրա նապալմային հարձակումից հետո, հայտնում է The Guardian-ը:

Ամենահայտնի լուսանկարներից մեկը, որը վիետնամական պատերազմի սարսափների ամենավառ վկայություններից մեկն է (լուսանկարի համար հեղինակ Նիկ Ուտը 1973 թվականին Պուլտիցերյան մրցանակ է ստացել), Facebook սոցցանցում հրապարակել է գրող Թոմ Էգելանը: Նա այն ընտրել է վեց այլ լուսանկարների թվում, որոնք, նրա կարծիքով, փոխել են «պատերազմի պատմությունը»:

Facebook-ի ղեկավարությունը լուսանկարի հրապարակումը համարել է սոցցանցի կանոնների խախտում, որն արգելում է մերկ մարմինների պատկերների հրապարակումը, եւ ջնջել է այն: Գրողի եւ Facebook-ի առճակատմանը տեղեկացել է նորվեգական Aftenposten պարբերականը (Էգելանը նախկինում այնտեղ է աշխատել) եւ հանդես է եկել հրապարակման հեղինակի աջակցությամբ՝ սոցցանցում տեղադրելով նույն լուսանկարը: Պարբերականի գլխավոր խմբագիր Էսպեն Հանսենի հասցեին ծանուցում է ուղարկվել, որով նրան խնդրել են ռետուշել լուսանկարը կամ այն ջնջել: Գլխավոր խմբագիրը հրաժարվել է պահանջը կատարել եւ բաց նամակ է գրել սոցցանցի ղեկավար Մարկ Ցուկերբերգին, որում պնդել է, որ նա «աշխարհի ամենազոր խմբագիրը չէ»: Նրա խոսքով՝ ամեն դեպքում պետք է կարողանալ պատմական լուսանկարը տարբերակել պոռնկագրականից:

Ի պաշտպանություն Aftenposten-ի՝ սոցցանցում հանդես է եկել Նորվեգիայի վարչապետ Էռնա Սուլբերգը, ով նույնպես հրապարակել է հայտնի լուսանկարը: Ի պատասխան՝ ուրբաթ օրը Facebook-ը ջնջել է նրա հրապարակումը ևս: Դրանից հետո վարչապետը կոչ է արել, այնուամենայնիվ, մտածել այդ ուղղությամբ եւ իր կանոնները վերանայել:

Վարչապետն ափսոսանք է հայտնել, որ սոցցանցը հեռացրել է լուսանկարը, նրա կարծիքով՝ դրանով այն օգնում է «խոսքի ազատության կասեցմանը»: «Ես հայտարարում եմ, որ գրաքննության այդպիսի ձեւ չկա»,- հայտարարել է Նորվեգիայի վարչապետը: