Մալախովը լքել է Առաջին ալիքը

«Թող խոսեն» շոուի թիմը լքել է Առաջին ալիքը: Այդ մասին, ինչպես հայտնում է Lenta.ru-ն, հաղորդել է ՌԻԱ Նովոստիի իրազեկ աղբյուրը:
Լրագրողների զրուցակցի խոսքով, ծրագրի հաղորդավար Անդրեյ Մալախովի ազատման դիմումի հետ կապված իրավիճակը պարզ չէ, այն, «ամենայն հավանականությամբ դեռ չի ստորագրվել»:

Շոուի պրոդյուսեր Նատալյա Գալկովիչն իր Instagram-ում տեսանյութ է հրապարակել, որում ծրագրի աշխատողները լքում են «Օստանկինո» հեռուստակենտրոնը` իրենց հետ տանելով նաև Մալախովի` բնական մեծության ստվարաթղթե ֆիգուրը: Հրապարակման գրառման մեջ նշվում է, որ Գալկովիչն արդեն նոր աշխատանք է գտել:

Ոճաբան Վլադ Լիսովեցն իր հերթին հայտնել է գործակալությանը, որ մասնակցել թոք շոուի նոր թողարկման նկարահանումներին: Նրա խոսքով, հաղորդավար է դարձել Դմիտրի Բորիսովը, սակայն այդ կապակցությամբ որևէ հայտարարություն դեռ չի եղել: «Հյուրերը նույնն են, բայց Անդրեյը չկա: Ոչինչ չեն ասել, ամբողջ ճանապարհին կարծում էի, որ նա դուրս կգա, կհայտնվի, որ դա անակնկալ կլինի, բայց ոչ: Ոչ ոք էլ չհայտնվեց, ծրագիրը սկսվեց և ավարտվեց: Խոսում էին Անդրեյի մասին»,- պատմել է նա:
Ավելի վաղ Առաջին ալիքի աղբյուրը նշում էր, որ Մալախովի հետ կապված իրավիճակը պետք է վերջնականապես պարզվի օգոստոսի 14-ին: Միաժամանակ նշվում էին նոր հաղորդավարների անուններ` Դմիտրի Շեպելյովի և Դմիտրի Բորիսովի: Առաջինը հրաժարվել է մեկնաբանություններից և խորհուրդ տվել դիմել ալիքի մամուլի ծառայություն, մյուսը խորհուրդ է տվել դիտել նրա մասնակցությամբ այլ ծրագրեր: -0-