Քոչարյանի կադրերը վերադառնում են

«Հրապարակ»-ը գրում է․

Սերժ Սարգսյանի հայտարարած փոփոխությունները լայն թափով մեկնարկելու են երեքշաբթի օրվանից սկսած, քանի որ վաղը ոչ աշխատանքային մեռելոց է:
Այսպես, օրինակ` նոր ձեւավորվելիք Կառավարության մասով Արտաքին գործերի նախարար Էդվարդ Նալբանդյանի ազատումը կարող է մի քանի օր ուշ լինել, քանի որ նա սեպտեմբերի 12-ին Մոսկվայում պետք է մասնակցի ԱՊՀ երկրների ԱԳնախարարների հանդիպմանը: Վիգեն Սարգսյանի ԱԳ նախարար նշանակվելուն պես նախագահի աշխատակազմի ղեկավար կնշանակվի Արմեն Գեւորգյանը, ով էլ դեռ չեկած բերում է իր թիմին:

Մինչ գործադիրում փոփոխություններին, արդեն իսկ փոփոխություններ են սկսվել նախագահի աշխատակազմում: Արդյունքում դուրս է մղվում Սերժ Սարգսյանի փեսայի` Վատիկանում ՀՀ դեսպան Միքայել Մինասյանի թիմը: Նրա ընկերներին նախագահը հեռացնում է`փորձելով ցույց տալ, թե փոփոխություններ է անում` անկախ անձերից ու իր հետ ունեցած կապերից։

Armlur.am-ը արդեն հայտնել է, որ աշխատանքից ազատվել է Սերժ Սարգսյանի օգնական Սևակ Լալայանը: Նրա փոխարեն օգնական է նշանակվել Ալեքսան Հարությունյանը, ով նախկինում զբաղեցնում էր Արգենտինայում ՀՀ արտակարգ և լիազոր դեսպանի պաշտոնը, իսկ դրանից առաջ էլ զբաղեցրել է Հանրային հեռուստատեսության եւ ռադիոյի խորհրդի նախագահի պաշտոնը: Հետաքրքիր է, որ Սեւակ Լալայանը նախագահի աշխատակազմի չվարկաբեկված, երբեւէ սկանդալների մեջ չհայտնված անձանցից է, նրա ազատումը չի տեղավորվում վարկաբեկվածներին հեռացնելու թեզի շրջանակներում:

Մեր տեղեկություններով` աշխատանքից ազատվելու է նաեւ նախագահի աշխատակազմի «Հանրային կապերի և տեղեկատվության կենտրոն» ՊՈԱԿ-ի տնօրեն Արա Սաղաթելյանը:
Նախագահի աշխատակազմում նոր նշանակվող մարդիկ երկրորդ նախագահ Ռոբերտ Քոչարյանի թիմից են: