Զինված խմբի գործով անցնող «Էլեկտրիկ Երևանի» ակտիվիստները փոխադարձ մեղադրանքներ են հնչեցնում

Նորքի զինված խմբի գործով անցնող մեղադրյալ Նելլի Մինասյանը դատական վերջին նիստից հետո լրագրողների հետ զրույցում հայտարարել էր, որ ողջ մեղադրանքը կազմվել է մեկ մարդու՝ գործով ամբաստանյալներից Տիգրան Բոյաջյանի ցուցմունքի հիման վրա։ Վերջինս, ըստ Մինասյանի, նախաքննական իր ցուցմունքում իրեն մեղավոր էր ճանաչել, ապա դատարանում հայտարարել է, թե անմեղ է. «Իրա (խմբ.- Տիգրան Բոյաջյանի) խոսքը ինձ համար անհասկանալի էր, քանի որ իրա մեղադրական եզրակացությունում ինքը իրան մեղավոր ա ճանաչել, հիմա չի ճանաչում: Ամբողջ մեղադրական եզրակացությունը կազմված է միայն ու միայն իրա ցուցմունքների հիման վրա»,- ասել էր Մինասյանը։

«Առաջին լրատվական»-ը կապ հաստատեց բնակության վայրից չբացակայելու ստորագրությամբ ազատ արձակված Տիգրան Բոյաջյանի հետ։ Վերջինս նշեց, որ Նելլի Մինասյանի հետ ծանոթացել է Բաղրամյանում անցկացվող հոսանքի թանկացման դեմ ուղղված բողոքի միջոցառումների ժամանակ. «Նելլիին առաջին անգամ տեսել եմ Բաղրամյանում ջրցանով հավաքը ցրելուց րոպեներ անց, նա ամբողջությամբ թաց էր, իսկ ինձ հաջողվել էր չթրջվել, իմ մայկան եմ հագիցս հանել և տվել, որպեսզի փոխվի և չմրսի-հիվանդանա, իսկ ծանոթություն, որպես էդպիսին, ավելի ուշ է եղել»։

Հետաքրքրվեցինք, թե ինչո՞ւ է գործի վերաբերյալ հակասական ցուցմունքներ տվել: «Այս քրեական գործը առաջին իսկ օրվանից գտնվել է հանրության ուշադրության կենտրոնում, և բազմիցս դրա վերաբերյալ հրապարակումներ են եղել: Նախաքննության ավարտից հետո գործի նյութերը հասանելի են, և այլևս որևէ մեկի համար գաղտնիք չի, թե նախաքննության ընթացքում ով, երբ և ինչ բովանդակությամբ ցուցմունք է տվել: Գործը գտնվում է դատարանում, դռնբաց նիստերի ընթացքում լուսաբանվում է, և հանրությունը նույնպես կտեղեկացվի քրեական գործի ընթացքում ձեռք բերված ապացույցների, առավել ևս՝ անձանց ցուցմունքների մասին»,-ասաց Տ. Բոյաջյանը։

Անդրադառնալով Ն. Մինասյանի այն հայտարարությանը, թե քրեական գործի մեղադրական եցրակացությունը ամբողջությամբ կազմված է իր ցուցմունքների հիման վրա, Տիգրան Բոյաջյանն ասաց. «Պետք է նշեմ, որ 2015 թվականի նոյեմբերի 25-ի հայտնի ձերբակալումից անմիջապես հետո գործով անցնող մի շարք մեղադրյալներ նոյեմբերի 25-ից սկսած տվել են ստվարածավալ և մանրամասն ցուցմունքներ: Նելլի Մինասյանը ևս ցուցմունք է տվել 2016 թվականի հունվարի 15-ին, որից 10 օր հետո առաջիններից մեկն էր, ով ազատ արձակվեց։ Պետք չէ իրավաբանական խորը գիտելիքներ ունենալ, որպեսզի հասկանալ, թե ինչի արդյունքում է նման աղմկահարույց գործերով մեղադրյալը առաջիններից հայտնվում ազատության մեջ և միգուցե հետագա ծառայություններ մատուցելու պայմանի դիմաց։ Ընդ որում՝ կալանքից ազատվելուն հաջորդել են Նելլի Մինասյանի ցուցմունքները, որտեղ նա ամենայն մանրամասնությամբ նկարագրել է դեպքին վերաբերող բազմաթիվ հանգամանքներ, ինչը հաստատ չի վկայում, որ վերջինս օգտվել է իր լռելու իրավունքից:

Նման պայմաններում ավելի քան տարօրինակ է, որ վերջինս առանց հոգեկան խնդիրների մասին հայտարարելու, քաջատեղյակ լինելով, որ ինչպես քրեական գործի նյութերը, այնպես էլ իր ցուցմունքները դռնբաց դատական նիստում վաղ թե ուշ հանրությանը մատչելի են դառնալու, նման հայտարարություններով է հանդես գալիս»։

Ըստ Բոյաջյանի՝ «նման վարքագիծ դրսևորելով՝ անձը, փորձելով իրեն ներկայացնել որպես քաղաքական հալածանքների ենթարկվող անձ, ընդամենը միկրոֆոնից կախում ունեցող մեկն է, ում համար կարևոր չի, թե դրա դիմաց ինչեր է ասում, և որքանով են դրանք իրականությանը մոտ»:

Ինչ վերաբերում է խմբի հետ առնչությանը, Տիգրան Բոյաջյանն ասաց, որ Արթուր Վարդանյանին ճանաչել է 2 ամիս, և այդ բնակարանում եղել է հենց Արթուրի հրավերով։ Մեր այն հարցին, թե ինչո՞ւ էր հրավիրել՝ խնջո՞ւյք էր, թե՞ Արցախի հարցի շուրջ քննարկումներ անցկացնելու համար՝ ինչպես որ նշում են Վարդանյանի պաշտպանները, մեր զրուցակիցն արձագանքեց. «Քննարկումներ, որպես այդպիսին, հաճախակի էին տեղի ունենում, բայց ասել, թե հավաքվել էինք հատուկ մի հարցով, այնքան էլ ճիշտ չի լինի»։

Դիտարկմանը՝ փաստորեն չի ընդունում, որ Նորքի այդ բնակարանում հավաքվել են շենք-շինություններ գրավելու մտադրությամբ, ինչպես գրվածէ մեղադրանքում, Տիգրան Բոյաջյանն արձագանքեց. «Թե ով ինչ մտադրություն է ունեցել՝ կդժվարանամ ասել, բայց մեկի կարծիքը կամ մտադրությունը փաթաթել մյուսների վզին, այնքան էլ խելամիտ քայլ չէ։ Դատական նիստերի ընթացքում պարզ կլինի՝ ով որքանով էր մեղավոր»։