Ըստ Բաղդասարյանի՝ Սերժ Սարգսյանը թույլ մարդ է

Դավիթ Մարտոյանը գրում է․

ՀՀԿ խմբակցության ղեկավար Վահրամ Բաղդասարյանը լրագրողների հետ զրույցում մեկնաբանելով վարչապետի պաշտոնից Հովիկ Աբրահամյանի հրաժարականի փաստը՝ պնդել էր, որ դա բացառապես նրա որոշումն է եղել, և նա է Սերժ Սարգսյանին այդ առաջարկով հանդես եկել:
«Գաղտնիք չէ, որ այս 2 տարվա և մի քանի ամսվա ընթացքում Հովիկ Աբրահամյանն իրեն չխնայեց, բայց այն բոլոր մարտահրավերները՝ աշխարհաքաղաքական, ներքին, արտաքին, ռազմական, հասարակության բևեռացումը և տնտեսական բարեփոխումների տեմպերը, նրան չէին բավարարում, և ինքն իր մեջ ուժ գտավ, որպեսզի հրաժարականի դիմում ներկայացնի: Ֆիքսեմ, որ ոչ բոլորի մոտ է այն ուժը, որ ինքնակամ հրաժարական տա վարչապետի պաշտոնից: Դա եղել է բացառապես իր որոշումը և ինքն է մտել նախագահի մոտ ու այդ առաջարկով հանդես եկել»,-ասել է Բաղդասարյանը:
Մենք էլ մեր հերթին ֆիքսենք, որ, փաստորեն, ըստ Վահրամ Բաղդասարյանի, Սերժ Սարգսյանը թույլ մարդ է։ 8 տարվա մեջ նա ավիրել է տնտեսությունը, ձախողել ներքին և արտաքին բոլոր ոլորտներում, ավելի քան 300 հազար մարդ է արտագաղթել Հայաստանից, կրճատվել են ներդրումները, արտահոսել է կապիտալը, փայ մտնելը դարձել է բիզնեսի չգրված կանոն, աղքատությունն աճել է երկնիշ թվով, դոմինանտ է դարձել ստորությունը, քծնանքը, սուտ խոսելը, հասարակության կարծիքն արհամարհելը, քաղաքական և լրատվական դաշտի մեծ մասին գնել և փչացրել է, կեղծել է ընտրությունները և այլն և այլն:
Ու այսքանից հետո Սերժ Սարգսյանն իր մեջ ուժ չի գտնում ինքնակամ հրաժարական տալու։ Դեռ ավելին՝ հավակնում է ցմահ իշխել, ու այդ նպատակի համար դիմում է հնարավոր և անհնար բոլոր խարդավանքների և օրինախախտումների։
Իհարկե, Վահրամ Բաղդասարյանը նպատակ չի ունեցել իր շեֆին թուլակամ հանել, բայց դե ստացվել է ըստ Ֆրեյդի։ Թեև, ի՞նչ իմանաս...