«Գիտեմ, որ կարել ես կուսաթաղանթդ». տղամարդը շանտաժով փող է շորթել ընկերուհուց

Վերաքննիչ քրեական դատարանի վարույթում է Արթուր Խ.-ի գործով պաշտպանական կողմի բերած վերաքննիչ բողոքի քննությունը:

Գործը քննվել է Շենգավիթ վարչական շրջանի ընդհանուր իրավասության դատարանում Նելլի Բաղդասարյանի նախագահությամբ:

39-ամյա Արթուր Խ.-ին մեղադրանք էր առաջադրված շորթում կատարելու համար՝ ՀՀ քրեական օրենսգրքի 182 հոդվածի 1-ին մասով:

Ըստ մեղադրանքի՝ շորթմամբ գումար հափշտակելու դիտավորությամբ Արթուր Խ.-ն 2017 թվականի հունվարի 11-ին, ժամը 9-ն անց 37-ին զանգահարել է Ամալյա Հ.-ին (անունը փոխված է), ով պատրաստվում էր ամուսնանալ:

Արթուր Խ.-ն ներկայանալով «Կարեն» անունով՝ Ամալյային ասել է, թե տեղյակ է, որ նա մինչև ամուսնությունը մեկ այլ անձի հետ սեռական հարաբերություններ է ունեցել, ապա որպես կույս աղջիկ ամուսնանալու նպատակով «կարել է կուսաթաղանթը»: «Կարենը» զգուշացրել է, որ իր մոտ առկա է ասածը վկայող բժշկական փաստաթուղթ:

Հիշյալ տեղեկությունն ու փաստաթուղթը Ամալյայի ամուսնուն չփոխանցելու, Ամալյային խայտառակ չանելու համար Արթուր Խ.-ն պահանջել է 1000 դոլար:

Հետագա օրերի հեռախոսազրույցների ու հաղորդագրությունների փոխանակման ընթացքում Արթուր Խ.-ն արդեն ամուսնացած Ամալյայից պահանջել է 400 հազար դրամ:

Ամալյան ձևացրել է, թե համաձայնության է եկել:

Պայմանավորվածության համաձայն՝ 2017 թվականի հունվարի 25-ին Ամալյան Երևանի Գր. Լուսավորիչ փողոցում հանդիպել և Արթուրին է փոխանցել 400 հազար դրամ:

Հենց այդ ժամանակ ոստիկանության աշխատակիցները մոտեցել ու Արթուր Խ.-ին բերման են ենթարկել ոստիկանության Շենգավիթի բաժին:

2017 թվականի հունվարի 27-ին ընդհանուր իրավասության դատարանը Արթուր Խ.-ի խափանման միջոց է ընտրել կալանավորումը:

2017 թվականի ապրիլի 12-ին վերաքննիչ քրեական դատարանը ընտրված խափանման միջոց կալանավորումը վերացրել է, 2 ամիս 17 օր կալանքի տակ մնալուց հետո Արթուր Խ.-ն ազատ է արձակվել:

Դատարանում Արթուր Խ.-ն իրեն լիովին մեղավոր է ճանաչել, նրա միջնորդությամբ գործը քննվել է արագացված ընթացակարգով:

Դատարանը հաշվի է առել, որ Արթուր Խ.-ի խնամքին են երկու անչափահաս երեխաները, մեկը՝ մինչև 14 տարեկան: Արթուր Խ.-ն բնութագրվել է դրական, 2014 թվականից հաշվառված է «Նպաստ» համակարգում, ընդունել է մեղքը, տվել է խոստովանական ցուցմունքներ, զղջացել է կատարածի համար:

Տուժողը քաղաքացիական հայցի պհանջ չի ներկայացրել:

Արթուր Խ.-ն մեղավոր է ճանաչվել շորթման համար՝ ՀՀ քրեական օրենսգրքի 182 հոդվածի 1-ին մասով, և դատապարտվել է 2 տարի ազատազրկման: Այս պատժին հաշվակցվել է Արթուր Խ.-ի՝ կալանքի տակ գտնված ժամանակը, վերջնական պատիժ է սահմանվել 1 տարի 9 ամիս 13 օր իրական ազատազրկումը:

Պատժի սկիզբը կհաշվվի Արթուր Խ.-ին փաստացի կալանքի տակ առնելու պահից, եթե ընդհանուր իրավասության դատարանի դատավճիռն օրինական ուժի մեջ մտնի:

Դատավճիռը բողոքարկվել է ամբաստանյալի շահերի պաշտպանի կողմից:

Վերջինս պահանջել է բեկանել դատավճիռը, Արթուր Խ.-ին դատապարտել ոչ թե ազատազրկման, այլ՝ տուգանքի, կամ ազատազրկման ձևով նշանակված պատիժը պայմանականորեն չկիրառել, կամ գործն ուղարկել նույն ստորադաս դատարան՝ նոր քննություն կատարելու: