Ռուս աղջիկը ստել է, որ Միհրան Հարությունյանը ծեծել է իրեն. քրգործի հարուցումը մերժվել է

Սոչիի ոստիկանությունը մերժել է քրեական գործ հարուցել Ռիո 2016-ի արծաթե մեդալակիր հունահռոմեական ոճի ըմբիշ 66 կգ քաշային Միհրան Հարությունյանի նկատմամբ՝ ռուս մոդել Նիկոլ Տենին ծեծելու մեղադրանքով: Այս մասին գրում է Mk.ru-ն: Մարզիկի ներկայացուցիչը՝ Արթուր Գալստյանը, պատմել է, որ դատաբժշկական փորձաքննության համաձայն՝ մոդելին պատճառված վնասվածքներն առողջությանը վնաս հասցնող չեն եղել, եւ որ փաստերը, որոնք աղջիկը նշել է իր հաղորդման մեջ, չեն հաստատվել:

Ավելի վաղ, Նիկոլ Տենը ոստիկանության իր հաղորդման մեջ պատմել է՝ ինչպես է ծանոթացել Հարությունյանի հետ եւ ինչ է տեղի ունեցել իրենց միջեւ: Նա նշել է, որ սկզբում ցանկացել է աշխատանքի տեղավորվել ժամանցի վայրերից մեկում, որը կապվում է մարզիկի հետ: Աշխատանք ստանալու համար նա հարցազրույցի է գնացել նրա մոտ: Հարցազրույցը չի անցել, սակայն նրանց միջեւ սիրավեպ է սկսվել: 2 ամիս անց՝ այս տարվա օգոստոսի 2-ին, նա մեկնել է Սոչի՝ Միհրանի հետ հանգստանալու: Օրեր անց մարզիկը նրան հաղորդագրություն է ուղարկել՝ հայտնելով, որ ամուսնացած է եւ պահանջելով հանգիստ թողնել իրեն: Հետո, ըստ մոդելի, ըմբիշը եկել է հյուրանոց, որտեղ ինքը հանգստանում էր, նրան մեքենա է նստեցրել, ծեծել նրան, վերցրել անձնագիրն ու հեռախոսը եւ ջնջել իրենց օնլայն նամակագրությունը:

^{Նիկոլ Տենի՝ լուսանկարը}

Mk.ru-ն նշում է, որ ըստ Միհրան Հարությունյանի եւ նրա ընկերների՝ աղջիկը ստում է գումար կորզելու համար: Mk.ru-ն գրում է նաեւ, որ Նիկոլ Տենի ընկերուհին՝ Դարյա Գուսեւան, հաստատել է, որ մոդելը ստում է: Որպես ապացույց լրատվամիջոցը ներկայացնում է նամակագրության լուսանկար, որտեղ զրուցակիցներից մեկը մյուսին խնդրում է հարվածել իրեն, որ կարողանա ոստիկանություն դիմել: Թեեւ լուսանկարում չի երեւում զրուցողների անունները, Mk.ru-ն վստահեցնում է, որ դա Նիկոլի եւ ընկերուհու խոսակցությունն է:

^{Ըստ Mk.ru-ի՝ ընկերուհիների զրույցը}