Թուրքմենիայի նախագահը սպառնացել է ոչնչացնել Ալիևին

2017 թվականի օգոստոսի 23-24-ին Հայաստանի Հանրապետության Նախագահ Սերժ Սարգսյանի հրավերով պաշտոնական այցով Հայաստանի Հանրապետություն էր ժամանել Թուրքմենստանի նախագահ Գուրբանգուլի Բերդիմուհամեդովը:

Հայաստանի Հանրապետության Նախագահ Սերժ Սարգսյանը և Թուրքմենստանի նախագահ Գուրբանգուլի Բերդիմուհամեդովը բարձր մակարդակի բանակցությունների արդյունքներով ստորագրել են համատեղ հայտարարություն: Ստորագրվել են նաև Հայաստանի Հանրապետության և Թուրքմենստանի միջև մի շարք ոլորտներում երկկողմ համագործակցության խորացմանն ուղղված փաստաթղթեր:

Կողմերը շահագրգռվածություն են հայտնել նաև տնտեսական համագործակցության հետագա ընդլայնման և տվյալ ոլորտում առկա ներուժի իրացման հարցում։ Այդ նպատակով նրանք առավելագույն աջակցություն կցուցաբերեն առևտրաշրջանառության ծավալների մեծացմանը, էներգետիկայի, տրանսպորտի և հեռահաղորդակցության, գյուղատնտեսության, ոսկերչության, թեթև և վերամշակման արդյունաբերության, ինչպես նաև նորարարության և մի շարք այլ ոլորտներում փոխգործակցության զարգացմանը:

-Հայ-թուրքմենական համագործակցությունը ՀՀ անկախությունից ի վեր ծավալուն բնույթ է կրել և կնքվել է ավելի քան 70 պայմանագիր: Նույնը չենք կարող ասել Ադրբեջանի դեպքում: ԽՍՀՄ փլուզումից հետո Թուրքմենստանն ու այս երկիրը չեն կարողանում համաձայնության գալ մի շարք հարցերի շուրջ, որոնց շարքում է օրինակ՝ Կասպից ծովում գտնվող նավթահանքերի շահագործումը (Կյապազ(Սերդար) Օսման և Օմար): Ըստ հաշվարկների՝ այդ նավթահանքերն ավելի մոտ են գտնվում Թուրքմենստանին, որն էլ բազմիցս է նշել, որ պատրաստվում է ռազմական գործողություններ սկսել Ադրբեջանի դեմ: 2002 թվականին արդեն պատրաստել էին մի քանի ռազմանավ և հրթիռներ տեղափոխող մոտորանավակներ: Բայց ռուսական կողմը հայտարարեց Կասպից ծովում լայնածավալ զորավարժություններ սկսելու մասին, ինչից հետո Թուրքմենստանը ժամանակավոր հետ կանգնեց ռազմական գործողություններ սկսելու մտքից,-լրագրողների հետ հանդիպման ժամանակ ասաց թուրքագետ Մուշեղ Խուդավերդյանը՝ շեշտելով, որ Թուրքմենստանի նախագահը, համաձայն լրատվամիջոցների տարածած տեղեկատվության, մի քանի անգամ զանգահարել է Ալիևին ու ասել, որ պատրաստ է ոչնչացնել նրան, եթե չհամաձայնի նավթահանքերը տալ իրենց:

-Իր նավթային պաշարների մեծությամբ Թուրքմենստանը մի քանի անգամ գերազանցում է Ադրբեջանին, և եթե իր նավթային եկամուտներին համապատասխան զինտեխնիկա գնի, ապա մի քանի անգամ կգերազանցի Ադրբեջանին: Միայն երրորդ կողմի շնորհիվ է, որ ռազմական գործողություններ չեն սկսվում: Դրանք գերտերություններն են՝ ԱՄՆ, Ռուսաստան և այլն: Երկրներ, որոնք Կասպից ծովում կարևոր շահեր ունեն,-ընդգծեց թուրքագետը: